रुकुम पूर्व । रुकुम पूर्वको सिस्ने गाउँपालिका ३ पोखरामा बारदलीमा खेल्ने क्रममा करिब ७ फिट उचाइबाट लडेका एक ७ वर्षीय बालक गम्भीर घाइते भएपछि उपचारका लागि नेपाली सेनाको हेलिकप्टरमार्फत नेपालगञ्ज लगिएको छ ।
जिल्लाको सिस्ने ३ पोखरा निवासी लोकेन्द्र केसीका छोरा प्रतुस केसी बिहीबार दिउँसो १ बजे लडेर घाइते भएपछि स्थानीयले दिउँसो २ बजे रुकुम पूर्व अस्पताल (जिल्ला अस्पताल) मा ल्याएका थिए ।
बालकको दाहिने खुट्टाको घुँडामाथि हड्डी भाँचिएको, अवस्था मध्यम तर (बोल्न सक्ने) रहेको जिल्ला प्रहरी रुकुम पूर्वले जनाएको छ । थप उपचारका लागि हिजो नै नेपाली सेनाको हेलिकप्टरमार्फत नेपालगञ्ज रेफर गरिएको प्रहरीले जनाएको छ ।
घटनास्थलमा जिल्ला प्रहरी कार्यालय रुकुम पूर्वबाट प्रहरी हवलदार राजेश भाटको कमाण्डमा ३ जनाको टोली खटिएको थियो ।
प्रकाशित मिति: शुक्रबार, मंसिर १९, २०८२
