सर्लाही । छठ पर्व अन्तर्गत आज साँझ अस्ताउँदो सूर्यलाई अर्घ दिइएको छ ।
कात्तिक शुक्ल षष्ठी अर्थात् छठ पर्वको मुख्य दिन आज साँझ अस्ताउँदो सूर्यलाई पूजा आराधना गरी विधिपूर्वक अर्घ दिइएको छ ।
आज बिहानै स्नान गरी दिनभर निर्जल व्रत लिएका व्रतालुले बेलुकी अस्ताउँदो सूर्यलाई अर्घ दिएका हुन् ।
कात्तिक शुक्ल चतुर्थीदेखि सप्तमीसम्म मनाइने सूर्यदेवको आराधना, उपासना र पूजाको यो पर्व शनिवारदेखि सुरू भएको थियो ।
आज रातभर जागा बसी भोलि मंगलबार सप्तमीका दिन बिहान उदाउँदो सूर्यलाई पूजा आराधना गरी विधिपूर्वक अर्घ दिएपछि यो पर्व समापन हुने सर्लाहीको चक्रघट्टा गाउँपालिका–३, की बर्तालु पुनम सिंहले बताउनुभयो ।
तराई मधेश केन्द्रीत छठ पर्व पछिल्लो समय राष्ट्रिय पर्व बन्न पुगेको सर्लाही मलङ्गवा नगरपालिका निवासी नागरिक समाजका अगुवा शिवचन्द्र चौधरीले बताउनुभयो ।
२०४६ सालअघि तराईको सीमित क्षेत्रमा मनाइने छठले अहिले राष्ट्रिय स्वरुप ग्रहण गरेको हो ।
छठ पर्वको अवसरमा आज देशभर सार्वजनिक बिदा दिइएको छ । छठ पर्वकै लागि मधेश प्रदेशमा भोलि मंगलबार पनि थप एक सार्वजनिक बिदा दिइएको छ ।
प्रकाशित मिति: सोमबार, कात्तिक १०, २०८२
