मुगु । मुगुको छायाँनाथ रारा नगरपालिका १० चराप गाउँमा लगातार परेको पानीका कारण घर भत्किँदा ९ घर परिवार आवासविहीन भएका छन् ।
साउन ११ गतेदेखि १४ गतेसम्म परेको पानीको कारण छायाँनाथ रारा नगरपालिका १० चराप गाउँका चार घर पूर्ण र पाँच घर आङ्शिक रूपले क्षति हुँदा ९ घर परिवार घरविहीन भएका हुन ।
अहिले उनीहरु छिमेकीहरूको घरमा बस्न बाध्य भएका छन् ।
तीन दिनसम्म लगातार परेको पानीका कारण साउन १४ गते बेलुका ५ बजेतिर चार घर भत्किँदा सँगै जोडिएका अन्य पाँच घरमा आंशिक क्षति पुगेको स्थानीय देवी कृष्णा बुढाले जानकारी दिनुभयो ।
उहाँका अनुसार घर भत्किँदा मानवीय क्षति नभए पनि घरभित्र रहेका अन्न, भाँडाकुँडालगायत सामग्री र धनमालमा क्षति पुगेको छ ।
जिल्ला प्रहरी कार्यालयले दिएको जानकारी अनुसार चारवटा घर पूर्ण रूपले क्षति भएका र सँगै जोडिएका अन्य घरहरूमा आंशिक क्षति पुगेको छ ।
आवासविहीन सिर्जना बढुवालले भन्नुभयो, ‘छिमेकीहरूको घरमा शरण लिनु परेको छ । खाने अन्न र भाँडाकुँडा सबै भत्किएका घर भित्र छन् । छिमेकीहरूले दिएको अन्नपानी खाने गरेका छौं । प्रहरीले मात्र मुचुल्का गरेको छ । घर भत्किएको ५/६ दिन पुगिसक्यो सरकारी निकायबाट अहिलेसम्म राहत पाएका छैनौँ ।’
जिल्ला विपद् व्यवस्थापन समितिका संयोजक तथा प्रमुख जिल्ला अधिकारी कमलप्रसाद पाण्डेका अनुसार २०८१ बैशाख ३ गतेबाट जिल्ला विपद ब्यस्थापनबाट राहत उपलब्ध गराउन नमिल्ने भनि नीति संशोधन भएकाले राहत उपलब्ध भएको छैन ।
स्थानीय तह राहत कार्यविधि २०८१ अनुसार पालिकाले तत्काल राहत उपलब्ध गराइ जिल्ला विपद् व्यवस्थापन समितिमा अनुमोदन गराउनुपर्ने प्रावधान अनुसार तत्काल राहत उपलब्ध गराउनुपर्ने जानकारी गराएको उहाँले बताउनुभयो ।
प्रकाशित मिति: मंगलबार, साउन २०, २०८२
