पोखरा । अपाङ्गता भएका व्यक्तिहरूले आफ्नो अधिकार रक्षा हुने गरी कानुन बनाउन सांसदहरूसँग माग गरेका छन् ।
गण्डकी प्रदेशका अपाङ्गता भएका व्यक्तिको अधिकार सम्बन्धमा व्यवस्था गर्न बनेको विधेयकमाथि समीक्षात्मक छलफल कार्यक्रममा अपाङ्गता भएका व्यक्तिले यस्तो माग गरेका हुन् ।
सामुदायिक रेडियो प्रसारक संघद्वारा सञ्चालित सीआईएनले आफ्नो नियमित रेडियो कार्यक्रम "हेलो सांसद" कार्यक्रमका लागि गरिएको छलफल कार्यक्रममा सरोकारवाला निकायका प्रतिनिधिले सांसदहरूमाझ आफ्ना सवाल राखेका छन् ।
सामाजिक विकास तथा कृषि समितिका सभापति दमयन्ती रुचालले छलफलबाट आएका सुझावलाई समितिले ग्रहण गरेर विधेयकमा समेट्ने प्रतिबद्धता जनाउनुभयो ।
प्रदेश सांसद देवका पहारी त्रिपाठीले अपाङ्गता भएका व्यक्तिहरु र सरोकारवालाको माझमा राखेर समीक्षात्मक कार्यक्रम गरेकोमा हेलो सांसद कार्यक्रमलाई धन्यवाद् दिनुभयो ।
सांसद सुनिता थापाले आफू पनि अपाङ्गता भएकाले आफूले धेरै सवालहरु समितिमा उठाउने र प्रत्येक परिच्छेदमा आएका सुझावलाई विधेयकमा समेट्न दवाव दिइरहने बताउनुभयो।
गण्डकी प्रदेश माओवादी संसदीय दलका नेता हरिबहादुर चुमानले आफू पूर्व कानुन मन्त्री भएर गरेको अनुभवका आधारमा विधेयकलाई अन्तिम रुप दिनुभन्दा अघि जनता र सरोकारवालाको बढीभन्दा बढी सुझाव लिनुपर्ने बताउनुभयो ।
गण्डकी प्रदेश, संसदिय पत्रकार मञ्चका अध्यक्ष भरत कोइरालाले विधेयकको परिच्छेद ४ मा उल्लेख गरे अनुसार सीप विकास, रोजगार तथा स्वरोजगारको व्यवस्थालाई कार्यान्वयनमा ल्याउन एक संयन्त्रको समेत व्यवस्था गर्नुपर्ने बताउनुभयो ।
स्वावलम्वन जीवन पद्धती केन्द्र पोखराका अध्यक्ष हेम गुरुङ, राष्ट्रिय अपाङ्ग महासङ्घ गण्डकी प्रदेशका उपाध्यक्ष अन्जना केसी, नेपाल नेत्रहिन सङ्घका केन्द्रिय सदस्य लक्ष्मण सुवेदी, श्रवण दृष्टिविहीन सङ्घका सचिव हरि केसी, गण्डकी वहिरा सङ्घका अध्यक्ष किसान तामाङ, नेपाल हेमोफेलिया सोसाईटी गण्डकीका अध्यक्ष गोविन्द भण्डारी, अकोराव गण्डकी प्रदेशका कोषाध्यक्ष तीर्थ केसीलगायतले विधेयकको विभिन्न परिच्छेदमा संसोधनका क्रममा आफ्ना सवालहरु समेट्न आग्रह गर्नुभयो ।
पत्रकार सूर्य परियारले आफू आँखा नदेख्ने भएकाले धेरै अवसरबाट वञ्चित हुनु परेकाले आफू जस्तो व्यक्तिका लागि रोजगारका लागि विषेश व्यवस्था हुनुपर्ने बताउनुभयो।
अकोराव गण्डकी प्रदेशका सचिव मोतिसागर अधिकारीले स्वागत मन्तव्य राख्नुभयो भने अकोराव गण्डकी प्रदेशका अध्यक्ष ओमकार आचार्यले सहभागिहरुलाई धन्यवाद् ज्ञापन गर्नुभयो ।
प्रकाशित मिति: बिहीबार, असार १२, २०८२
