भालुखोला, मकवानपुर । बागमती प्रदेश सभाले ल्याएको नीति तथा कार्यक्रममा समावेश विपद् पूर्व तयारी र विपद्पछिको प्रतिकार्यको कार्यक्रमका लागि पर्याप्त बजेटको व्यवस्था गर्न सरोकारवालाले माग गरेका छन् ।
सामुदायिक रेडियो प्रसारक सङ्घ (अकोराब) नेपालले सोमबार मकवानपुरको मकवानपुरगढी गाउँपालिका–५ भालुखोलामा गरेको सार्वजनीक सुनुवाइ कार्यक्रममा सहाभगी सांसद तथा सरोकारवाला निकायका प्रतिनिधिले यस्तो माग गरेका हुन् ।
मकवानपुरगढी ६ का लिलानाथ न्यौपानेले जथाभावी खानी खनिएका बाढी, पहिरोको जोखिम हुँदा पनि प्रदेश सरकार र सभाले ध्यान नदिएको गुनासो गर्नुभयो ।
प्रदेश सरकारलाई उत्तरदायी बनाउनका लागि प्रदेश सांसद र संसदले खबरदारी गर्नुपर्ने बताउनुभयो ।
आर्थिक वर्ष सकिने बेलामा जथाभावी बजेट खर्च गर्ने परिपाटी अन्त्य नभएका कारण समयमा नै विपद् नियन्त्रणका लागि प्रभावकारी काम नभएको उहाँको भनाइ थियो ।
स्थानीय टोल विकास समितिका सचिव बासुदेव चौलागाईँले बाढीको जोखिममा रहेको आफूहरूको गाउँमा पहिलो पटक यस्तो अन्तरक्रिया भएकोमा खुसी व्यक्त गर्दै यसअघि नै यस्ता छलफल भएको भएमा सरकार र संसदलाई आफ्ना कुरा राख्न पाइने थियो भन्नुभयो ।
आफतकालीन कोष बनाएर विपद् प्रभावितलाई राहतको व्यवस्था गर्न उहाँले माग गर्नुभयो । अर्का स्थानीय खगराज मल्लले आफूहरूलाई आर्थिक सहायताका कार्यक्रम ल्याउन सांसदसँग माग गर्नुभयो ।
कार्यक्रममा मकवानपुरगढी गाउँपालिकाकी उपाध्यक्ष मानकुमारी नेपालीले स्थानीय सरकारले तत्कालीन रुपमा राहत र उद्दारको काम गर्न सके पनि दीर्घकालीन योजनाका लागि भने प्रदेश र संघीय सरकारकै भर पर्न बाध्य रहेको बताउनुभयो ।
प्रदेश सरकार र स्थानीय सरकारबीचको समन्वयका लागि र विपद्को सामना गर्नका लागि पर्याप्त बजेटको व्यवस्था गर्न प्रदेश सभाले सरकारलाई निर्देश दिनुपर्ने बताउनुभयो ।
वडाध्यक्ष दिपेश दाहालले नीति तथा कार्यक्रममा प्रभावकारी जस्तो लाग्ने तयारी देखिए पनि बजेट विनियोजन पर्याप्त होस् भन्नका लागि सांसदहरूले विशेष ध्यान पुर्याउनुपर्ने धारणा राख्नुभयो ।
अर्का वडाध्यक्ष कृष्णप्रसाद बजगाईले मकवानपुरगढी गाउँपालिका वर्षामा बाढी, पहिरो, चट्याङ जस्ता विपद्को जोखिममा रहेको र सुख्खा मौसममा डँढेलो र आगलागीको जोखिममा रहेको जानकारी गराउँदै विपद् पीडितलाई राहत वितरण गर्न भने झन्झटिलो भएको सुनाउनुभयो ।
यो झन्जटलाई सजिलो बनाइदिनका लागि समन्वयकारी भूमिका खेलिदिन सांसदसँग अनुरोध गर्नुभयो ।
काभ्रेबाट बागमती प्रदेश सभा सदस्यमा निर्वाचित रुकु चौलागाईले इन्जिनियरिङ बिना नै पूर्वाधार विकासका कार्य गरिनु, अवैध खानी सञ्चालन हुनुले विपद्को जोखिम बढेको जानकारी गराउँदै सभामा विपद्को विषयमा जिम्मेवारीपूर्ण भूमिकासहित छलफलको अभ्यास नभएको उल्लेख गर्नुभयो ।
सभामा दलका नेताहरुका अगाडि प्रदेश सभा सदस्य निरीह हुनुपरेको बताउँदै यसपालीको नीति तथा कार्यक्रममा विपद् पूर्व तयारी र प्रतिकार्यका लागि एक पन्नामा विषय समावेश भएको र त्यस अनुसार पर्याप्त बजेटको व्यवस्था होस् भन्नका लागि आफ्नो हर प्रयास रहने उहाँको प्रतिबद्धता थियो ।
प्रदेश सभा सदस्य तथा उद्योग पर्यटन तथा वातावरण समिति सदस्य भारती पाठकले प्रदेश सभामा विपद्को विषयमा छलफल भए पनि पर्याप्त नभएको धारणा राख्दै मानव वन्यजन्तु द्वन्द्व व्यवस्थापन, ८ महिना अघिको विपद्पछिको प्रभावका बारेमा स्थलगत अध्ययनपछि तयार भएको प्रतिवेदनका बारेमा संसदीय समिति र सभामा छलफल गरेर आवश्यक निर्देशन दिनका लागि पहल गर्ने प्रतिबद्धता जनाउनुभयो ।
विकास र वातावरण संरक्षणबीच सन्तुलन कायम हुनुपर्ने उल्लेख गर्नुहुँदै सांसद पाठकले भन्नुभयो, ‘जोखिमको अध्ययन गरेर पूर्वाधार विकासको कार्य गर्नु जरुरी छ । विपद्बाट बच्नका लागि पूर्वसूचना प्रणाली पनि विकसित गर्नु जरुरी छ । यो दुबै कामका लागि मैले प्रदेश सभामा आवाज उठाउँछु ।’
प्रकाशित मिति: बुधबार, जेठ २२, २०८२
