ताप्लेजुङ । विश्वको तेस्रो तथा नेपालको दोस्रो अग्लो शिखर कञ्चनजङ्घा हिमाल आरोहण गर्ने क्रममा एक फ्रान्सेली आरोहीको मृत्यु भएको छ ।
दक्षिणी आधार शिविरबाट आरोहणका क्रममा ६३ वर्षीया महिला मारगेटा मोरिङको मृत्यु भएको हो ।
मोरिङको यही वैशाख २७ गते राति करिब ११ बजे मृत्यु भएको जिल्ला प्रहरी कार्यालय ताप्लेजुङका सूचना अधिकारी, प्रवक्ता तथा प्रहरी निरीक्षक विवेक वस्नेतले जानकारी दिनुभयो ।
उहाँका अनुसार हिमाल आरोहणको लागि गएका दुई जना फ्रान्सेली नागरिकमध्ये मोरिङको मृत्यु भएको हो ।
करिब आठ हजार मिटरको उचाइमा पुगेपछि स्वासप्रश्वासमा समस्या उत्पन्न भइ मोरिङको मृत्यु भएको गाइड योगेन्द्र तामाङले जानकारी दिनुभयो ।
आरोही महिलाको २७ गते राति निधन भए पनि वैशाख २९ गते प्रहरी समक्ष जानकारी प्राप्त भएको जिल्ला प्रहरी कार्यालय ताप्लेजुङले जनाएको छ ।
आरोहण क्षेत्र सञ्चारको पहुँचदेखि टाढा रहेकोले दुई दिन ढिला मात्र खबर प्राप्त भएको प्रहरीले जनाएको छ ।
प्रहरीका अनुसार मृतक महिलाको शव अहिले करिब सात हजार पाँच सय मिटरको उचाइमा रहेको छ । उक्त स्थान प्रहरी चौकी याम्फुदिनबाट करिब ७५ किलोमिटरको दुरीमा रहेको बताइएको छ ।
प्रकाशित मिति: मंगलबार, वैशाख ३०, २०८२
