गोरखामा गन्धर्व समुदायका महिलालाई सारङ्गी बजाउने तालिम

साहित्य सङ्गीत

अस्मिता सिंखडा सोमबार, चैत ३, २०८१

गोरखा । गोरखामा गन्धर्व समुदायका महिलाका लागि सारङ्गी बजाउने तालिम सुरु गरिएको छ ।

किशोरीदेखि वयस्क महिला पनि यो तालिममा सहभागी भएका छन् । गोरखा नगरपालिका–७, धारापानीकी ६० वर्षकी दुर्गादेवी गान्धारी राम्रो गीत गाउनु हुन्छ ।

सानै उमेरमा साराङ्गी भिरेर गाउँगाउँमा साराङ्गीको धुनमा गीत सुनाउदै हिड्ने आफ्‌नो बुबाको सरसङ्गतले दुर्गादेवीलाई गाउन सक्ने त बनायो तर साराङ्गी तारमा औँला चलाएर सङ्गीत निकाल्न जान्नुभएन ।

परिवारका सदस्यले पनि परम्परागत पेशा छोड्दै गएपछि त्यसलाई जर्गेना गर्न भन्दै हिजोआज बुढेसकालमा साराङ्गी सिक्न थाल्नु भएको छ ।

साराङ्गी सिक्न अहिले गन्धर्व समुदायका ७० वर्षकी महिलादेखि युवायुवतीहरू पनि उत्तिकै उत्साहित भएका छन् ।

हजुरआमादेखि नातिनीसम्म सबै सारङ्गी सिक्दा भूल्दै गएको गन्धर्व समुदायको पुर्ख्यौली पेशाको जर्गेना हुन्छ की भन्ने लाग्ने गरेको सहभागीहरूको भनाइ छ ।

आफ्‌नो वुवाआमा, हजुरवुवा र हजुरआमाको सपना पूरा गर्न सारङ्गी बजाउन सिकेको बताउनुहुन्छ २१ वर्षकी अनु गान्धारी ।

बुवाले औँला चालेको हेरेको भरमा सारङ्गी बजाउन सिक्नु भएकी भगवती गान्धारी भने अहिले आफै आफ्‌नो समुदायका महिलालाई साराङ्गी बजाउन सिकाउनु हुन्छ ।

आफ्‌नो जातिको मुख्य पेशा साराङ्गी बाजा लोप हुँदै गएपछि गन्धर्व समुदायका महिलालाई भेला गरेर उहाँले साराङ्गी बजाउन सिकाउन थाल्नु भएको हो ।

अक्षर चिन्नेहरू देखि नचिन्नेहरुसम्म पनि साराङ्गी सिक्न तालिममा सहभागी भएको प्रशिक्षक भगवती गान्धारीको भनाइ छ ।

तालिम सञ्चालनका लागि गोरखा नगरपालिका वडा नम्बर ७ ले सहजिकरण गरेको छ ।

प्रकाशित मिति: सोमबार, चैत ३, २०८१

अस्मिता सिंखडा सोमबार, चैत ३, २०८१

प्रतिक्रिया दिनुहोस्