बाँके । लोक सङ्गीत, रेडियो उद्घोषण र मञ्च प्रस्तुतीमा छुट्टै पहिचान बनाउनु भएका नेपालगन्जका ६६ वर्षीय वरिष्ठ कलाकार कमल विक निर्मोही अहिले ओछ्यानमा सीमित हुनुभएको छ ।
दुवै मृगौलाले काम गर्न छोडेपछि हप्तामा दुईपटक डायलासिस गराउनु परेको छ । २ वर्ष यता स्वास्थ्य समस्या भए पनि गएको फागुनबाट उहाँ अर्कैको आडभरमा चल्नुपर्ने अवस्थामा पुग्नुभएको हा ।
निर्मोहीले सङ्कलन र सङ्गीत संयोजन गरेको र गायिका कोमल ओली अनि माया ओलीका साथमा २०४४ सालमा गाएको ‘मलाई छेक्यो मायालु तिम्रै मायाले’ बोलको यो गीत रेडियो नेपालको सुर्खेत प्रशारण केन्द्रबाट निकै बज्यो ।
भरत लामाको शब्दमा माया गुरुङ र कमल विक निर्मोहीले गाएको यो गीत पनि स्थानीय एफएम रेडियोमा कुनै बेला धेरै गुन्जिन्थ्यो ।
स्थानीय माटो, मौलिकता र भाकामा आवाज दिएका निर्मोही यतिखेर भने अस्वस्थ हुनुहुन्छ ।
गायकको रुपमा मात्रै होइन, रेडियो प्रस्तोता र विभिन्न सार्वजनिक सभासमारोहको उद्घोषणमा रमाउने उहाँ अहिले सामान्य शब्द उच्चारण गर्दा पनि जिव्रो लरबराउँछ ।
रेडियो नेपालको सुर्खेत प्रशारण केन्द्रको सुरुवातदेखि नै सक्रिय कमल विक निर्मोहीले पश्चिमका भाकालाई रेडियोमा पुर्याउने माध्यम बन्नुभयो ।
त्यो बेला स्थानीय कलाकारलाई प्रोत्साहन दिने उहाँको सोचले कैयौँ नयाँ गायक–गायिकाले गीत रेकर्ड गर्ने अवसर पाएको गायिका कोमल ओली बताउनुहुन्छ ।
जीवनभर रेडियो र सार्वजनिक सभासमारोह तथा मञ्चमा रमाएका निर्मोही अहिले उपचारका लागि आर्थिक अभाव झेलिरहनुभएको छ । नेपालगन्जका स्थानीय बुद्धिजीवि, युवाहरुले ‘वरिष्ठ कलाकार कमल विके निर्मोही सहयोग समिति’ गठन गरेका छन् ।
अभियानका संयोजक नमस्कार शाहले निर्मोहीका लागि आर्थिक सहयोग सङ्कलन सुरु गरिएको जानकारी दिनुभयो ।
निर्मोहीले करिब ३० भन्दा धेरै गीतमा स्वर दिनुभएको छ । मध्य तथा सुदुरपश्चिमको पहिलो व्यावसायिक रेडियो वागेश्वरी एफएम स्थापना गर्ने अगुवामध्येका पनि उहाँ हुनुहुन्छ ।
स्थानीय कला र गलालाई अवसर दिनका लागि निर्मोहीले वेब मल्टिट्रयाक रेकर्डिङ स्टुडियो पनि नेपालगञ्ज्मा चलाउनुभयो ।
गायन, उद्घोषण र कलाकारितामा जहिल्यै अरुलाई अवसर दिने कमल विक निर्मोही आफू थला पर्दा भने पर्याप्त सहयोग नपाएकोमा चिन्ति हुनुहुन्छ ।
सीआईएनसँग कुरा गर्दै नेपाल सङ्गीत नाट्य प्रज्ञा प्रतिष्ठानका उपकुलपति सम्भु राईले गायक निर्मोहीलाई आफूले राम्रो कलाकारको रुपमा चिनेको भन्दै उहाँको स्वास्थ्य उपचारका लागि सक्दो सहयोग गर्ने प्रतिबद्धता जनाउनुभयो ।
आफू नेतृत्वको प्रतिष्ठानमा कलाकारलाई उपचारका लागि आर्थिक सहयोग गर्ने कोष नभए पनि नेपाल प्रज्ञाप्रतिष्ठान, ललितकला प्रज्ञा प्रतिष्ठान, सङ्गीत नाट्य प्रज्ञा प्रतष्ठानको संयुक्त कोषमार्फत सहयोग गर्न सकिने उहाँको भनाइ छ ।
उक्त सहयोगका लागि निर्मोहीको परिवारको सदस्य वा कुनै सङ्घसंस्थाको तर्फबाट कागजी प्रक्रिया सुरु गर्न पनि उपकुलपति राईले अनुरोध गर्नुभयो ।
प्रकाशित मिति: आइतबार, कात्तिक २, २०८२
