काठमाडौँ । नेपाली सुगम सङ्गीतका अमर स्वर दीपक खरेलको पहिलो वृहत् अर्केस्ट्रासहितको एकल साँझ “इकोज अफ इटरनिटी” यही चैत २७ गते नेपाल प्रज्ञा प्रतिष्ठानमा हुने भएको छ।
कार्यक्रममा खरेलले आफ्ना कालजयी ‘पूर्णिमाको रात पनि’, ‘तिम्रो त्यो हँसिलो मुहारको’, ‘यो कर्मभूमीको आँगनमा’, ‘प्रतिक्षा गर मेरी मायालु’, ‘बादल बनाइदेऊ’, ‘गरुँ कि मीठो भूल’ र ‘बिहानीको सिरेटोमा’सहित १७ गीतहरू प्रस्तुत गर्नुहुनेछ ।
विशेष साङ्गीतिक साँझमा नर्वेका ४ जना कलाकारसहित कुल ५२ जना वाद्यवादक तथा १६ जना युवा तथा बालबालिकाको कोरस प्रस्तुति रहने आयोजक संस्था सुधाकर भ्वाइलिन स्कुलले जनाएको छ ।
कार्यक्रममा ११ वर्षदेखि ७० वर्ष उमेर समूहका सङ्गीतकर्मीहरूको सहभागिता रहने र यसले सङ्गीतको तीन पुस्ताबीचको साङ्गीतिक सेतु निर्माण गर्ने आयोजकको विश्वास छ।
“नेपाली सुगम सङ्गीत रुचाउनेहरूका लागि यो कार्यक्रमबाट अविस्मरणीय अनुभव दिनका लागि म तयारी गरिरहेको छु । यसखालको अर्केस्ट्रासहितको कार्यक्रमले श्रोताहरूलाई एउटा फरक अनुभव दिनेछ,” गायक खरेलले भन्नुभयो ।
कार्यक्रमका परिकल्पनाकार सुधाकर वस्तीका अनुसार “इकोज अफ इटरनिटी” खरेलका कालजयी गीतहरूको संरक्षण तथा नयाँ पुस्तामा हस्तान्तरण गर्ने उद्देश्यले आयोजना गरिएको हो।
कार्यक्रमका लागि सहयोगी संस्थाकाका रुपमा काठमाण्डौँ प्रज्ञा कुञ्ज स्कूल र अन्नपूर्ण स्कूल अफ अर्केस्ट्रा रहेका छन् । कार्यक्रमको टिकट खल्ती एपमा उपलब्ध हुने बताइएको छ ।
२०१३ साल साउन १३ गते काभ्रेपलाञ्चोकमा जन्मिएका खरेलले बाल्यकालदेखि नै सङ्गीतप्रति गहिरो लगाव राख्दै आफ्नो साङ्गीतिक यात्रा अघि बढाउनुभएको हो ।
व्यवस्थापनमा स्नातकोत्तर शिक्षा हासिल गरी राष्ट्रसेवामा संलग्न रहँदै उहाँले २०३४ सालमा ‘मैले रचेको गीत’ बाट औपचारिक गायन यात्रा सुरु गर्नु भएको थियो ।
प्रकाशित मिति: बुधबार, चैत १८, २०८२
