काठमाडाैँ । पूर्व सभामुख तथा नेकपा माओवादी केन्द्रका उपाध्यक्ष कृष्णबहादुर महरालाई चार दिन हिरासतमा राख्न अदालतले अनुमति दिएको छ। काठमाडौँ जिल्ला अदालतका न्यायाधीश दुर्गाप्रसाद खनालको इजलासले महरालाई चार दिन हिरासतमा राख्न अनुमति दिएको अदालतका सूचना अधिकारी चन्द्रप्रसाद पन्थीले जानकारी दिनुभयो । जिल्ला सरकारी वकिल कार्यालय काठमाडाैँले महरालाई सात दिन थुनामा राख्न माग गर्दै आज अदालतमा पेश गरेको थियो ।
प्रहरीले महरालाई आज विहान कपिलबस्तुबाट पक्राउ गरी काठमाडाैँ ल्याएको थियो ।
महरामाथि प्रहरीको केन्द्रीय अनुसन्धान ब्युरो (सिआइबी) ले संगठित अपराध कसुरमा अनुसन्धान अघि बढाएको छ।
विद्युतीय चुरोट (भेप) मार्फत ९ किलो सुन तस्करी गरेको प्रकरणमा अनुसन्धानका लागि महरालाई पक्राउ गरिएको प्रहरीले जनाएको छ । ९ किलो सुन र ६० किलो सुन तस्करी भएको विषयमा अनुसन्धान गर्न गठित जाँचबुझ आयोगले महरालाई पनि दोषी किटान गर्दै मुद्दा चलाउन सिफारिस गरेको थियो।
जाँचबुझ आयोगले गत बिहीबार बुझाएको प्रतिवेदन कार्यान्वयन गर्ने सरकारले निर्णय गरेको छ । सीआईबीका तत्कालिन प्रमुख एआईजी किरण बज्राचार्यसहित ४ जना प्रहरी अधिकारीले अनुसन्धानमा बदनियत राखेको पाइएको भन्दै सरकारले सुरुवा गरेको छ । छानबिन आयोगले उनीहरूका साथै पूर्व प्रहरी महानिरीक्षक सर्वेन्द्र खनाल र धिरजप्रताप सिंहलाई पनि निगरानीमा राख्न सुझाव दिएको छ ।
प्रकाशित मिति: सोमबार, चैत ५, २०८०, १८:४४
