काठमाडौँ । नेकपा माओवादी केन्द्र, नेकपा एमाले, राष्ट्रिय स्वतन्त्र पार्टी (रास्वपा), र जनता समाजवादी पार्टी (जसपा) बीच नयाँ गठबन्धन बनाउने बारेमा छलफल भएको छ ।
यसबारेमा गएराति प्रधानमन्त्रीको सरकारी निवास बालुवाटारमा गम्भीर छलफल भएको बैठकमा सहभागी एक नेताले दाबी गरे ।
उनका अनुसार बैठकमा प्रधानमन्त्री तथा नेकपा माओवादी केन्द्रका अध्यक्ष प्रचण्डले नै अहिलेको गठन्धनमा समस्या देखिएको, चाहेजसरी काम गर्न नपाएका कारण नयाँ गठबन्धनको प्रस्ताव राख्नुभएको थियो ।
बैठकमा एमालेले विगतमा गरिएको गठबन्धन प्रचण्डकै कारण टुटेको भन्दै फेरि गठबन्धन बनाउनुअघि यसको दीर्घकालीन योजना र आयु लामो हुन्छ भन्ने सुनिश्चित हुनुपर्नेमा जोड दिएको थियो ।
त्यसैअनुसार आआफ्नो पार्टीमा छलफल गरेर आज फेरि बैठक बस्ने सहमति गरेर नेताहरू छुटेको बालुवाटार स्रोतले जनाएको छ ।
नयाँ गठबन्धन र अहिलेको गठबन्धनको समीक्षा र योजना बनाउन बालुवाटारमा माओवादी केन्द्रको पदाधिकारी बैठक बिहानैदेखि बसिरहेको छ भने नेकपा एमालेलेको सचिवालयको बैठक पनि अध्यक्ष केपी शर्मा ओली निवास बालकोटमा चलिरहेको छ ।
प्रकाशित मिति: सोमबार, फागुन २१, २०८०, ०८:२७
