नवलपरासी । तीजका बेला घर–घरमा जम्मा भएर रमाइला एवं वेदनाका गीत गाउने चलन पुरानो हो तर संरक्षणका कुरा भने विरलै हुने गरेका छन् ।
यसपटक नवलपरासीको गैँडाकोटमा जल, जमिन र जङ्गलको महत्त्व दर्शाउन १३ वटा समूहले चेतनामूलक तीज गीत प्रस्तुत गरेका छन् ।
संरक्षण र पर्यावरणका विषयमा सन्देशसहितका प्रतियोगितामा गैँडाकोटका १३ संरक्षणमुखी वन र खानेपानी संस्थासमूहबीच प्रतिस्पर्धा भएको थियो ।
केहीले ‘जताततै प्लटिङ बसेको छ बाँझो खेत, भोकमरीको चपेटामा पर्ने हो की देश’ भन्दै चिन्ता व्यक्त गरेका थिए । केहीले ‘हिरा, मोती, सुन फल्छ हाम्रो देशको माटोमा, अवरोध नपुर्याउँ है हिड्ने बाटोमा’ भन्दै सजग गराएका थिए ।
केहीले भने ‘जल, जङगल जमिनसँगै जोडिएको जीवन, सफा बनाऔँ, वातावरण स्वस्थ नै हो धन’ भन्दै सन्देशसमेत दिएका थिए ।
प्रतियोगितामा जयश्री सामुदायिक वन प्रथम हुन सफल भएको छ भने गैँडाकोट पम्पीङ्ग स्किम खानेपानी तथा सरसफा उपभोक्ता संस्था द्वितीय भएको छ । नमुना शिवनगर खानेपानी तथा सरसफाई उपभोक्ता संस्था तृतीय हुन सफल भएको छ ।
सान्त्वना पुरस्कार नारायणी सामुदायिक वनले प्राप्त गर्न सफल भएको छ ।
प्रथम हुनेलाई २० हजार, द्वितीय हुनेलाई १५ हजार, तृतीय हुनेलाई १० हजार र सान्त्वनालाई ५ हजार रुपैयाँसहित प्रमाणपत्र पुरस्कार प्रदान गरिएको प्रतियोगिताका संयोजक एवं सहमतिका कोषाध्यक्ष तारादेवी शर्माले जानकारी दिनुभयो ।
प्रकाशित मिति: शनिबार, भदौ ३०, २०८०, १४:३०
