काठमाडौँ । पछिल्लो समय नेपालमा दादुराको सङ्क्रमण तीव्र गतिमा फैलिरहेको सरकारले जनाएको छ । स्वास्थ्य मन्त्रालयअन्तर्गतको परिवार कल्याण महाशाखाका अनुसार गएको पुसयता काठमाडौँसहित १६ जिल्लामा दादुरा सङ्क्रमण फैलिएको छ । यी जिल्लाका १ हजार भन्दा बढी बालबालिकामा दादुरा पुष्टि भएको पनि महाशाखाले जनाएको छ ।
यो अवधिमा सबैभन्दा बढी बाँकेमा ३ सय २९ जना बालबालिकामा दादुराको सङ्क्रमण भेटिएको छ । यस्तै, महोत्तरीमा १ सय ५, सर्लाहीमा ७७, बर्दियामा ७३, सुर्खेतमा ६५, जना सङ्क्रमित भएका छन् ।
सङ्क्रमित हुनेमा नवजात शिशुदेखि १५ वर्षसम्मका बालबालिका छन् । दादुरा सङ्क्रमण बढेसँगै सरकारले यही जेठ २५ गतेदेखि सुनसरी, मोरङ, महोत्तरी, बर्दिया, दाङ, सुर्खेत, कैलाली, कञ्चनपुर र बाजुरामा ६ महिनादेखि १५ वर्षमुनिका बालबालिकालाई दादुरा ररूबेलाविरुद्धको खोप दिइरहेको छ ।
खोप लगाउन छुटेका सबै बालबालिकालाई खोप लगाउन र दादुराको सङ्क्रमण देखिए तुरुन्तै नजिकैको स्वास्थ्य संस्थामा लैजान महाशाखाका प्रमुख डाक्टर विवेककुमार लालले आग्रह गर्नुभयो । कतिपय अवस्थामा दादुरा हो कि होइन भनेर पनि बिरामी र अभिभावक झुक्किएको पाइएकोले त्यस्तो बेलामा अस्पतालमै लगेर निर्क्योल गर्नुपर्ने उहाँको भनाइ छ ।
महाशाखाका अनुसार दादुराको सङ्क्रमण पुष्टि भएकामध्ये अधिकांश बालबालिका दादुराविरुद्धको खोप लगाउन छुटेका छन् । सरकारले सन् २०२६ सम्ममा दादुरा सङ्क्रमण उन्मुलन गर्ने लक्ष्य लिएको भए पनि खोप अभियान प्रभावकारी नहुँदा पुनः नेपालमा दादुरा सङ्क्रमण फैलिरहेको पाइएको छ । सरकारले यसै बर्ष दादुरा उन्मुलन गर्ने तयारी गरे पनि गत वर्ष बाँकेमा दादुराको सङ्क्रमण देखिएपछि सन् २०२६ सम्ममा दादुरा उन्मुलन गर्ने घोषणा गरेको छ ।
प्रकाशित मिति: सोमबार, जेठ २९, २०८०, १२:१३
