काठमाडौँ । आज भैरहवा, नेपालगञ्ज, धनगढी र दिपायलमा सबैभन्दा धेरै तातो महसुस गरिएको छ ।
नेपालगञ्जको अधिकतम तापक्रम आज ४१ दशम्लव ४, धनगढीमा ४० दशम्लव ३ र भैरहवा अनि दिपायलमा ३९ दशम्लव ८ डिग्री सेल्सियस तापक्रम मापन गरिएको मौसम पूर्वानुमान महाशाखाले जनाएको छ ।
पर्सिदेखि भने केही स्थानमा पानी पर्ने पूर्वानुमान गरिएकाले तापक्रम केही घट्ने अनुमान गरिएको छ ।
काठमाडौँको तापक्रम ३३ डिग्रीसम्म पुगेको छ भने जनकपुर, सिमरा, घोराही र वीरेन्द्रनगरमा तापक्रम करिब ४० डिग्री सेल्सीयस रहेको महाशाखाका मौसमविद डेविट ढकालले सीआईएनसँग बताउनुभयो ।
गर्मी बढ्दै गएकाले बालबालिका, जेष्ठ नागरिक र बिरामीहरूको विषेश ख्याल गर्नुपर्ने डाक्टरहरुले बताएका छन् ।
सीआईएनसँग कुरा गर्दै डाक्टर सारिका गोईतले गर्मीका कारण विभिन्न रोग लाग्ने भएकाले खानपानमा विषेश ध्यान दिन आग्रह गर्नुभयो ।
आज पोखरा, विराटनगर, ओखलढुङ्गा, धनकुटा, धरान, ताप्लेजुङ, जोमसोम र जिरी लगायतका क्षेत्रमा मेघगर्जन र चट्याङसहित हल्का पानी पर्ने सम्भावना रहेको महाशाखाले जनाएको छ ।
प्रकाशित मिति: बिहीबार, जेठ २, २०८२
