नेपालको प्रमुख नगदे बाली अलैँचीको निर्यात चालु आर्थिक वर्षमा करिब ७२ प्रतिशतले बढेको छ।
भन्सार विभागको तथ्याङ्कअनुसार चालु आर्थिक वर्षको पहिलो १० महिनामा नेपालबाट ५७ लाख ३ हजार ७७४ किलो अलैँची निर्यात भएको छ। उक्त परिमाणको अलैँचीबाट ११ अर्ब ४२ करोड ४४ लाख ४५ हजार रुपैयाँ आम्दानी भएको छ।
गत आर्थिक वर्षको सोही अवधिमा भने ३६ लाख ८६ हजार ६९५ किलो अलैँची निर्यात हुँदा ६ अर्ब ६७ करोड २२ लाख १४ हजार रुपैयाँ आम्दानी भएकोे थियो। निर्यात परिमाण र मूल्य दुवैमा भएको उच्च वृद्धिले नेपाली अलैँचीको अन्तर्राष्ट्रिय बजार विस्तार हुँदै गएको देखिएकोे छ।
तथ्यांकलाई तुलना गर्दा चालु वर्ष अलैँची निर्यातको मूल्य ४ अर्ब ७५ करोड २२ लाख ३१ हजार रुपैयाँले बढेको छ। प्रतिशतकाआधारमा यो वृद्धि करिब ७१ दशमलब ३ प्रतिशत हो। निर्यात परिमाण पनि २० लाख १७ हजार ७९ किलोले बढेको छ, जुन अघिल्लो वर्षको तुलनामा करिब ५४ दशमलब ७ प्रतिशत बढी हो।
अन्तराष्ट्रिय बजारमा नेपाली अलैचीँको माग बढ्नुको कारणबारे सीआईएनसँग कुरा गर्दै अलैचीँ व्यवसायी महासंघका निवर्तमान अध्यक्ष निर्मल भट्टराईले नेपालको अलैचीँ गुणस्तरिय भएकाकारण माग बढेको बताउनुभयो ।
विशेषगरी पूर्वी पहाडी जिल्लामा उत्पादन हुने अलैँची नेपाली कृषिजन्य निर्यातको महत्वपूर्ण आधार मानिन्छ।
प्रकाशित मिति: आइतबार, जेठ ३१, २०८३
