काठमाडौँ । स्थानीय तहको निर्वाचनका लागि तयार पार्ने घोषणापत्रको बारेमा छलफल गर्न नेकपा एमालेको केन्द्रीय सचिवालय बैठक आज बस्दै छ ।
एमाले प्रचार विभाग उपप्रमुख विष्णु रिजालले आज साँझ साढे ६ बजे पार्टी अध्यक्ष केपी शर्मा ओलीको निवास भक्तपुरको बालकोटमा बैठक बोलाइएको जानकारी दिनुभयो ।
प्रतिबद्धतापत्र लगायत स्थानीय तहको निर्वाचनकै विषयमा छलफल गर्न बैठक बस्न लागेको उहाँले बताउनुभयो ।
केन्द्रीय सचिवालयको बैठक बस्नुअघि पार्टी केन्द्रीय कार्यालयको बैठक बिहान ११ बजेका लागि बोलाइएको छ ।
रिजालका अनुसार केन्द्रीय सचिवालयको बैठकले महानगर र उपमहानगरका उम्मेदवारहरूको विषयमा पनि छलफल गरेर आवश्यक निर्णय लिनेछ ।
एमालेले यही वैशाख ९ गते पार्टी स्थापना दिवसको अवसर पारेर प्रतिबद्धता पत्र सार्वजनिक गर्ने तयारी गरेको छ ।
प्रकाशित मिति: सोमबार, वैशाख ५, २०७९
