काठमाडौँ । नेपाल कम्युनिष्ट पार्टी नेकपाको प्रचण्ड-नेपाल समूहले आज काठमाडौँमा विरोध प्रदर्शन गर्दैछ ।
प्रधानमन्त्री केपी शर्मा ओलीले प्रतिनिधिसभा विघटनको घोषणा गरेपछि नेकपाको ओली समूह र प्रचण्ड-नेपाल समूहका बीचमा एकअर्काविरुद्ध प्रदर्शन गर्ने प्रतिस्पर्धा नै चलेको छ ।
प्रचण्ड-नेपाल समूहका प्रवक्ता नारायणकाजी श्रेष्ठका अनुसार आजको प्रदर्शनका लागि बिहान ११ बजे काठमाडौँका विभिन्न स्थानबाट जुलुश निकालिनेछ ।
बिभिन्न स्थानबाट निस्कने जुलुश भृकुटिमण्डपमा सभामा परिणत भएपछि शीर्ष नेताहरूले सम्बोधन गर्ने कार्यक्रम तय भएको उहाँले जानकारी दिनुभयो ।
जुलुस निस्कने ५ स्थानमा विभिन्न नेताहरुलाई जिम्मेवारी तोकिएको छ । सो समुहको आज पुल्चोक, त्रिपुरेश्वर, माइतीघर, केशरमहल र जमलबाट जुलुस निस्कनेछ ।
पुल्चोकबाट निस्कने जुलुसको नेतृत्व स्थायी समिति सदस्य कृष्णबहादुर महरा, पम्फा भुसाल, रघुजी पन्त, नेताहरु प्रमेश हमाल तथा संघ–प्रदेशका सांसदहरुले गर्नेछन् ।
त्रिपुरेश्वरबाट निस्कने जुलुसको नेतृत्व अष्टलक्ष्मी शाक्य, घनश्याम भुसाल, चक्रपाणि खनाल, जनार्दन शर्मा, मुकन्द न्यौपाने, युवराज ज्ञवाली, वर्षमान पुन, सुरेन्द्र पाण्डे, विष्णुपुकार श्रेष्ठलगायत केन्द्रीय कमिटी सदस्यहरुले गर्नेछन् ।
माइतीघरबाट निस्कने जुलुसमा नेताहरु अमृतकुमार बोहोरा, गणेश शाह, गिरिराजमणि पोखरेल, भीम आचार्य, मातृका यादव, हरिबोल गजुरेल तथा केन्द्रीय कमिटीका सदस्यहरु, सम्बन्धित प्रदेश कमिटी, संघ तथा प्रदेशका सांसदहरूले नेतृत्व गर्नेछन् ।
नेताहरु देवप्रसाद गुरुङ, देवेन्द्र पौडेल, भीम रावल, शक्तिबहादुर बस्नेत, केन्द्रीय कमिटी सदस्यहरु, सम्बन्धित प्रदेश कमिटीका सदस्यहरु, संघ तथा प्रदेशका सांसदहरुले केशरमहलबाट निस्कने जुलुसको नेतृत्व गर्नेछन् ।
जमलबाट निकाल्ने जुलुसमा लीलामणि पोखेल, केन्द्रीय कमिटी सदस्यहरु, पेसागत संगठन हेर्ने केन्द्रीय सदस्यहरु, पेसागत संगठन हेर्ने केन्द्रीय सदस्यहरुले गर्ने केन्द्रीय संघर्ष समितिले जनाएको छ । मुख्य जुलुस भने सुन्धाराबाट निस्ने जनाइएको छ ।
प्रधानमन्त्री केपी शर्मा ओलीले गत पुस ५ मा प्रतिनिधि सभा विघटन गरेपछि नेकपा दुई समूहमा विभाजित छ। ओली र प्रचण्ड-नेपाल भिन्न समूह बनाएर कार्यक्रम गरिरहेका छन्।
आजको प्रदर्शनमा दुई लाख मानिस सडकमा उतार्ने दाबी प्रचण्ड-नेपाल पक्षका नेता झलनाथ खनालले सीआईएनसँग बताउनुभयो ।
नेपाल कम्युनिस्ट पार्टी प्रचण्ड–नेपाल समूहले राजधानी काठमाडौंमा दोस्रो पटक शक्ति प्रदर्शन गर्न लागेको हो । यही माघ २३ मा भने नेकपा ओली समूहले नारायणहिटीअगाडि शक्ति प्रदर्शन गरेको थियो ।
प्रकाशित मिति: बुधबार, माघ २८, २०७७
