काठमाडौँ । चौतर्फी विरोध भएपछि सरकारले चारदिन अघि ल्याएका राजनीतिक दलसम्बन्धी अध्यादेश र संवैधानिक परिषद्सम्बन्धी अध्यादेश फिर्ता लिएको छ ।
आज बालुवाटारमा बसेको मन्त्रिपरिषद् बैठकले दुवै अध्यादेश फिर्ता लिने निर्णय गरेको हो । सत्तारुढ दल नेकपाका बहुमत सचिवालय सदस्य, स्थायी कमिटी सदस्यले दुवै अध्यादेश फिर्ता लिन दवाव दिएपछि सरकार आफ्नो निर्णयबाट पछि हट्न बाध्य भएको हो ।
यही वैशाख ८ गते सरकारले राजनीतिक दलसम्बन्धी र संवैधानिक परिषदसम्बन्धी अध्यादेश जारी गरेको थियो ।
राजनीतिक दल सम्बन्धी अध्यादेशमा पार्टी फुटाउन केन्द्रीय समिति वा संसदीय दलमा ४० प्रतिशत भए पुग्ने र संवैधानिक परिषदसम्बन्धी अध्यादेशमा प्रतिपक्षी दलको नेताविनै संवैधानिक परिषद्को बैठक बसेर आवश्यक निर्णय गर्न सक्ने व्यवस्था गरिएको छ ।
सरकारले ल्याएको ती दुई अध्यादेश सोही दिन साँझ राष्ट्रपतिबाट प्रमाणित भएर राजपत्रमा प्रकाशित भएको थियो ।
विपद्को समयमा नागरिकका लागि काम गर्न छोडेर सरकारले अनावश्यक निर्णय गरेको भन्दै सरकारको तिव्र आलोचना भइरहेको छ ।
पार्टी फुटाउने उद्देश्यले राजनीतिक दल सम्बन्धी अध्यादेश ल्याएर सरकारले अस्थीरता निम्त्याउन खोजेको भन्दै नेकपाभित्रै पनि असन्तुष्टि बढेको छ । प्रतिपक्षी दलको नेताविना संवैधानिक परिषदले निर्णय गर्न सक्ने व्यवस्था संविधानको मर्म विपरीत हुने भन्दै पार्टीभित्रै विरोध भइरहेको छ ।
प्रतिपक्षि नेपाली काँग्रेसले प्रधानमन्त्री निरङ्कुशताको बाटोमा हिड्न खोजेको भन्दै दुवै अध्यादेश फिता माग गरिहरको थियो ।
समाजवादी पार्टी र राजपालाई फुटाउन प्रधानमन्त्रीले अध्यादेश ल्याएको कतिपय नेताहरुले आरोप लगाएका छन् । तर प्रधानमन्त्री केपी शर्मा ओलीले भने आफ्ना पार्टीका सांसद र नेताहरुसँगको छलफलमा दुवै अध्यादेश आवश्यक भएरै ल्याएको बताउनुभएको थियो ।
सचिवालयको बैठकमा प्रधानमन्त्री ओलीले आफ्नो पार्टी फुटाउनका लागि भन्दा पनि अरु पार्टीको माग अनुसार राजनीतिक दलसम्बन्धी अध्यादेश ल्याउनुपर्ने बाध्यता रहेको बताउनुभएको थियो ।
पार्टीभित्र र बाहिरको दवावका बीच हिजो नेकपाका अध्यक्षा पुष्पकमल दाहाल प्रचण्ड र नेता माधवकुमार नेपालसँग छलफल गर्दै प्रधानमन्त्री ओलीले अध्यादेश फिर्ता लिन सकिने बताउनुभएको थियो ।
अध्यादेश बारेमा विवाद र दवाव बढ्दै गएपछि प्रधानमन्त्री ओलीले बिहान साढे ११ बजेका लागि मन्त्रिपरिषद् बैठक बोलाउनुभएको थियो ।
प्रकाशित मिति: शुक्रबार, वैशाख १२, २०७७
