काठमाडौं ।
नेपालमा कोरोनाविरुद्ध पर्याप्त सावधानी नअपनाएको भन्दै सरकारको आलोचना भइरहेका बेला स्थानीय सरकारहरूले भने आफूहरूले साधन स्रोतले भ्याएसम्म पूर्व तयारी गरेको र यस विषयमा सचेत रहेका बताएका छन् ।
सुदूरपश्चिम प्रदेशको डडेलधुराको नवदुर्गा गाउँपालिकाका अध्यक्ष कविन्द्रबहादुर विष्टका अनुसार पालिकाले विभिन्न चरणमा सचेतनाका कार्यक्रम गरेको छ ।
संक्रमण देखिइहालेको खण्डमा सुरक्षित तरिकाले राख्नका लागि ठाउँको व्यवस्थापन पनि हुँदैछ ।
बागमति प्रदेशको ललितपुर महानगरपालिकाले आफ्नै पहलमा कोरोना भाइरसको सङ्क्रमण रोक्न स्यानिटाइजर र मास्क बनाउन सुरु गरेको छ । बजारमा १७ रुपैयाँ पर्ने मास्क महानगरले ७ रुपैयाँमा उपलब्ध गराएको छ । स्यानिटाइजर पनि बजारको भन्दा निकै सस्तो छ ।
उप प्रमुख गीता सत्याल बजारमा देखिएको कृत्रिम अभाव हटाउन नास्टसँगको सहकार्यमा आफूहरूले यि सामग्री उत्पादन गरेको बताउनुहुन्छ ।
कोरोना भाइरस रोकथामका लागि सीमा नाकामा गरिने जाँचसँगै यसबारेमा जनचेतना फैलाउनु पनि महत्वपूर्ण छ ।
गण्डकी प्रदेशको नवलपरासीको कावासोती नगरपालिकाले पनि बजारमा देखिएको खाद्य अभाव र स्वास्थ्यजन्य सामग्रीको अनुगमन र सहज उपलब्धताका लागि काम गरिरहेको नगरपालिकाका उप प्रमुख प्रेमशंकर मर्दनिया थारुले बताउनुभयो ।
पालिकाका स्वास्थ्य शाखाका कर्मचारी र स्वास्थ्य कर्मीहरूसँग छलफल गरेर थप तयारीको काम पनि भइरहेको उहाँले बताउनुभयो । फेसबुक, युट्युबलगायतका सामाजिक सञ्जाल र विभिन्न सञ्चारमाध्यममा समेत कोरोनाका विषयमा गलत हल्ला र अफवाह चलाइएका छन् ।
वरिष्ठ जनस्वास्थ्य विज्ञ डाक्टर रविन्द्र अधिकारी स्थानीय सरकाहरुले आधिकारीक सूचना र डाक्टरसँगको परामर्शमा मात्रै यस सम्बन्धी निर्णय लिनुपर्ने बताउनुहुन्छ ।
नेपालमा हालसम्म कोरोनाकै कारण कसैको पनि मृत्यु भएको छैन भने साढे ४ सयभन्दा धेरैको जाँच गर्दा कसैमा पनि कोरोना देखिएको छैन ।
कोरोना भाइरसका विषयमा विभिन्न हल्ला फैलिरहेकाले नागरिकमा सही सूचना पु¥याउनु नै आफूहरूको मुख्य चुनौति भएको दोलखाको भिमेश्वर नगरपालिकाका उप प्रमुख कमला बस्नेतको भनाइ छ ।
अडियो सुन्नुहोस् :
प्रकाशित मिति: आइतबार, चैत २, २०७६, ०९:०१
