सोलुखुम्बु ।
कोरोना भाइरसको त्रासका कारण शहरबजार रित्तिएसँगै सोलुखुम्बुको गाउँ बस्तीमा चहलपहल बढेको छ । रोजगार र अध्यनका लागि गाउँघर छोडेका मानिसहरू भाइरसको त्रासले शहर छाडेपछि गाउँ घरमा चहलपहल बढेको हो ।
केही दिन अघिसम्म सुनसान देखिएको सोताङ क्षेत्रमा चहलपहल बाक्लो भएको स्थानीय डिल्ली बहादुर राईले बताउनुभयो ।
तराई तथा शहरी क्षेत्रमा सम्भावनाको खोजी गर्दै बसाइ सरेकाहरू समेत गाउँ घरमा भेटिन थालेका महाकुलुङ गाउँपालिकाका आसमान कुलुङको भनाइ छ ।
दशैं तिहार जस्ता चाडपर्वमा पनि हुन नसकेको भेट कोरोना त्रासले गरायो
दशैं तथा तिहार जस्ता महान चाडपर्वले समेत गाउँ नर्फकाएकाहरूलाई कोरोना भाइरस संक्रमणको त्रासले गाउँ फर्काएको छ ।
भूकम्प र चाडबाडको बेलाजस्तै मानिसहरू गाउँ फर्किरहेका नेचा सल्यान गाउँपालिकाका सुमन बस्नेतले बताउनुभयो ।
गाउँ घरमा जनशक्ति नभएपछि कयौं रोपनी खेतबारी बाँझै छ । युवा जनशक्ति गाउँ फर्किएसँगै यस वर्ष ति बाँझा खेतबारीमा अन्न बाली लगाउन सकिने बुढापाकाहरूको विश्वास छ ।
कोरनाको कारण विश्वमा आर्थिक क्षेत्रमा ठूलो संकट आउने आँकलन गरिएको बेला गाउँ फर्किएका युवाले कृषि र अन्य सम्भावनालाई पक्रन सके यसको प्रभाव सकारात्मक हुने लिखुपिके गाउँपालिकाका शिवबहादुर बस्नेत बताउनुहुन्छ ।
खाना पकाउन दाउरा, भान्छामा मकैको च्याख्ला, गाउँमै फलेका तरकारी पाक्ने भएकाले मुख्य बजारमा जस्तो समस्या गाउँमा नहुने भएकाले पनि मानिसहरू गाउँ फर्किउका थुलुङ दूधकोशी गाउँपालिकाका अम्मरबहादुर विश्वकर्माले बताउनु भयो ।
सडक मार्गबाट एक हप्तामा झन्डै पाँच हजार जना सोलुखुम्बु भित्रिए
एक हप्ताको अवधिमा सडक मार्गबाट मात्रै करिब ५ हजार मानिस सोलुखुम्बु भित्रिएका जिल्ला ट्राफिक प्रहरी कार्यालय सोलुखुम्बुले जनाएको छ ।
एक हप्ताको अवधिमा जिल्ला भित्रने मुख्य सडक मार्गबाट ४ सय २७ वटा जिप र ३१ वटा बस मार्फत् ४ हजार ७ सय ९७ जना सोलुखुम्बु भित्रिएका ट्राफिक प्रहरी कार्यालय सोलुखुम्बुले जानकारी दिएको छ ।
सार्वजानिक सवारी साधनको अभिलेख प्रहरीसँग भएपनि निजि सवारी साधनबाट पनि ठुलो संख्यामा यात्रुहरू भित्रिएका प्रहरीको भनाइ छ ।
जिल्लाबाट बाहिरिनेको संख्या न्यून भएपनि भित्रिनेको संख्या अत्यधिक रहेको यातायात व्यवसायीले बताएका छन् । हवाई मार्गबाट पनि ठूलो संख्यामा नागरिक जिल्ला भित्रिएका नागरिक उड्यन कार्यालय फाप्लुले जनाएको छ ।
प्रकाशित मिति: आइतबार, चैत ९, २०७६, १०:५६
