मुगु । विद्युत् उत्पादन क्षमताका हिसावले देशकै दोस्रो स्थानमा रहेको कर्णाली प्रदेशका प्राय सबैजसो जिल्लामा पूर्ण विद्युतीकरण हुन सकेको छैन । आगामी दुई वर्षमा देशका सबै घरधुरीमा विजुली पुराउने सरकारको लक्ष्य छ । अहिले वैकल्पिक उर्जासहित ९४ प्रतिशत जनसङ्ख्या विजुलीको पहुँचमा छ ।
२०७८ सालको जनगणना अनुसार मुगु जिल्लामा ६६ हजार ६ सय ५८ जनसङ्ख्या रहेकोमा करिब ६१ प्रतिशत अर्थात् ४० हजार नागरिक विजुलीको पहुँच बाहिर छन् । उनिहरु अहिले पनि टुकीको भरमा रात काटिरहेका छन् । २६ हजार तीन सय जना अर्थात् ३९ प्रतिशत नागरिकको घरमा मात्रै विजुली बलेको छ ।
विद्युत उत्पादनको क्षमता र सम्भावना रहेको मुगुमा पर्याप्त लगानी नहुँदा नागरिक अन्धकारमा बस्नु परेको हो । मुगुका चार वटा स्थानीय तहका ४५ वडा मध्ये ९ वटा वडामा मात्र विद्युतीकरण भएको छ ।
छायाँनाथ रारा नगरपालिकाका १४ वटा वडा मध्ये १०, ११, १२, र १४ नम्बर वडामा विजुली पुगेको छैन । यस्तै मुगुम कार्मारोङ्ग गाउँपालिकाका ९ वटा वडामध्ये ७ र ८ मा विद्युत पुगेको छैन भने वडा नम्बर १ मा आंशिक विजुली पुगेको छ ।
सोरु गाउँपालिकाका ११ वडा मध्ये तीन सय नागरिकको बसोबास रहेको नेर गाउँमा मात्रै विजुली बलेको छ । खत्याड गाउँपालिकाको २६ हजार जनसङ्ख्या मध्ये २३ हजार नागरिक विद्युतको पहुँच बाहिर छन् ।
कर्णालीका मुगु, हुम्ला र डोल्पामा हालसम्म राष्ट्रिय प्रसारण लाइनले छोएको छैन ।
प्रकाशित मिति: शनिबार, फागुन २०, २०७९, ०७:२५
