काठमाडौँ । एमसीए नेपालले मिलिनियम च्यालेन्ज कर्पोरेसन (एमसीसी) अन्तर्गतको चार सय केभी विद्युत् प्रसारण लाइनको विस्तृत खरिद प्रस्ताव आह्वान गरेको छ ।
एमसीए नेपालले बुधवार सूचना निकालेर प्लान्ट डिजाइन, आपूर्ति, वितरण, स्थापना र परीक्षणका लागि खरिद प्रस्ताव आह्वान गरिएको जनाएको हो ।
यसअघिको बोलपत्रमा लागत अनुमानको तुलनामा बोलपत्रदाताले उच्च लागत प्रस्ताव गरेपछि ठेक्का रद्द गरि प्रसारण लाइन परियोजनाको नयाँ टेन्डर आह्वान गरिएको एमसीए नेपालले जनाएको छ ।
३१५ किलोमिटर लामो प्रसारणलाइन परियोजनालाई तीन भागमा बाँडेर निर्माण प्रक्रिया अघि बढाइएको हो ।
पहिलो चरणमा लप्सीफेदीबाट रातमाटे हुँदै न्यू हेटौँडा खण्ड, दोस्रो चरणमा रातमाटेबाट न्यू दमौली खण्ड र तेस्रो लटअन्तर्गत न्यू दमौलीबाट न्यू बुटवल हुँदै भारतको सीमासम्म तोकिएको एमसीए नेपालले जनाएको छ ।
नयाँ रातमाटे सबस्टेसन निर्माणको लागत ६ अर्ब ८८ करोड रुपैयाँभन्दा बढी छ । यो पूर्वाधारले लप्सीफेदी र नयाँ हेटौँडा सबस्टेसनहरूबीच विद्युत् प्रसारणका लागि ‘महत्त्वपूर्ण सेतुका रूपमा’ काम गर्ने एमसीए नेपालले उल्लेख गरेको छ ।
एमसीसीको ५० करोड अमेरिकी डलर अनुदान र नेपाल सरकारको १९ करोड ५० लाख अमेरिकी डलर योगदानमा विद्युत् प्रसारण लाइन, सबस्टेसन र सडक सुधार आयोजना सञ्चालन हुँदैछ ।
त्यसमध्ये ३ सय १५ किलोमिटर लामो ४ सय केभी क्षमताको प्रसारण लाइन, ४ सय केभीकै तीनवटा सबस्टेसन तथा दाङको भालुबाङदेखि बाँकेको शिवखोलासम्म ७७ किलोमिटर सडक स्तरोन्नति गर्ने तीन परियोजना कार्यान्वयन हुनेछन् ।
यसअघि गत वर्षको जेठ ८ गते प्रसारण लाइनलाई तीन खण्डमा बाँडेर टेन्डर आह्वान भएकोमा निर्माणको प्रस्ताव गर्ने कम्पनीमध्ये पाँचवटा प्राविधिक रुपमा योग्य ठहरिएका थिए ।
सबैभन्दा कमको टेन्डर नै एमसीएको लागत अनुमानभन्दा ६६ प्रतिशत उच्च भएपछि सो टेन्डर प्रक्रियालाई गत २६ असोजमा रद्द गरिएको थियो । त्यो प्रसारण लाइनको न्यु बुटवलबाट गोरखपुरसम्मको १८ किलोमिटर लामो सीमापार खण्डलाई छुट्याएर यसअघि नै ठेक्का लागिसकेको छ ।
५ वर्षमा निर्माण सम्पन्न हुनैपर्ने, नभए अमेरिकी अनुदान फिर्ता जाने प्रकृतिको एमसीए परियोजना गत वर्षको भदौ १३ गतेबाट कार्यान्वयनमा आएको हो ।
प्रकाशित मिति: बुधबार, मंसिर १२, २०८१, ११:२९
