गाेल्डेन बुढा,रेडियो गुठिचाैर
जुम्ला । जुम्लाको हिमा गाउँपालिका -१ आचार्यलिहीमा भित्री खोला जलविद्युत् आयोजनाको पावर हाउस भासिँदा एकै घरका तीन जनाको मृत्यु भएको छ।
आज बिहान करिब साढे २ वजे आयोजनाको पावर हाउस भासिँदा तीन जनाको मृत्यु भएको हो ।
मृत्यु हुनेमा ३० वर्षीय विमला रावत र उहाँका दुई छोरा ९ वर्षीय भरत र ८ वर्षीय सूर्य रावत रहेका प्रहरीले जनाएको छ ।
पावरहाउसका चौकीदार गोरक बहादुर रावतका श्रीमती र दुईवटा छोराको घटनास्थलमै मृत्यु भएको हो ।
प्रहरी चौकी बड्किका अनुसार राति बत्ती किन गयो भनेर हेर्न जादा एकासी घर भासिएको थियो । उनीहरु तीनै जना आयोजनाको पावर हाउस नजिकै सुतिरहेका थिए ।
प्रहरी चौकी बड्किका रामप्रसाद चौलागाईंको कमान्डमा प्रहरी राति नै घटनास्थलमा पुगेको थियो ।
मृतकको शव पोष्टमार्टमका लागि कर्णाली स्वास्थ्य विज्ञान प्रतिष्ठानमा ल्याउने तयारी भइरहेको छ ।
