काठमाडौँ। नेपाल–भारत संयुक्त आयोगको छैटौँ बैठकका लागि नयाँदिल्ली पुग्नुभएका परराष्ट्रमन्त्री प्रदीपकुमार ज्ञवाली र भारतका बाह्य मामिलामन्त्री सुब्रह्मण्यम जयशङ्करबीच भेटवार्ता भएको छ ।
हैदरावाद हाउसमा आज बिहान भएको भेटवार्तामा उहाँहरुबीच नेपाल–भारत सम्बन्धका साथै समसामयिक क्षेत्रीय र अन्तरराष्ट्रिय चासोका विविध विषयमा छलफल भएको नयाँदिल्लीस्थित नेपाली दूतावासले जनाएको छ ।
बैठकमा परराष्ट्र सचिव भरतराज पौड्याल र भारतका लागि नेपाली राजदूत नीलाम्बर आचार्य तथा भारतका बाह्य मामिला सचिव हर्षवद्र्धन श्रृङ्गला र नेपालका लागि भारतका राजदूत विनयमोहन क्वात्रा पनि सहभागी हुनुभएको नयाँदिल्लीस्थित नेपाली राजदूतावासले जानकारी दिएको छ ।
आजै दुवै देशका परराष्ट्रमन्त्रीको सहअध्यक्षतामा आयोगको बैठक सोही भवनमा चलिरहेको छ ।
बैठकमा नेपाल–भारत सम्बन्धका सबै विषयसहित व्यापार, पारवहन, ऊर्जा, सिमाना, कोभिड–१९ सहयोग, भौतिक पूर्वाधार, सम्पर्क सञ्जाल, लगानी, कृषि, पर्यटन एवं संस्कृतिबारे छलफल चलिरहेको छ ।
बैठकमा दुवै देशका परराष्ट्र, वाणिज्य, अर्थ, जलस्रोत, ऊर्जा र रेल मन्त्रालय तथा विभागका उच्च अधिकारी पनि सहभागी छन्।
प्रकाशित मिति: शुक्रबार, माघ २, २०७७
