काठमाडौँ । रसुवा तथा आसपासका बाढीपहिरो प्रभावित क्षेत्रबाट आज ५८ जनाको उद्धार भएको छ ।
खोज तथा उद्धार अभियानअन्तर्गत नेपाली सेनासहितका सुरक्षा निकायले हवाई तथा जमिनबाट उद्धार कार्यलाई तीव्रता दिएको र आज साँझ ७ बजेसम्म नेपाली सेनाका ७ तथा गैरसैनिक ६ वटा हेलिकोप्टरमार्फत विभिन्न प्रभावित क्षेत्रबाट ५८ जनाको उद्धार गरिएको सैनिक जनसम्पर्क तथा सूचना निर्देशनालयले जनाएको छ।
त्रिशूली–३ ए जलविद्युत् आयोजनाको सुरुङभित्र फसेका दुई जनालाई नेपाली सेनासहितको संयुक्त खोज तथा उद्धार टोलीले जीवितै उद्धार गरेको छ।
नेपाली सेनाका ७५, सशस्त्र प्रहरी बलका १८ तथा नेपाल प्रहरी र विज्ञसहितको टोलीले उद्धार गरेका उनीहरूलाई थप उपचारका लागि हेलिकप्टरबाट काठमाडौंको वीरेन्द्र अस्पताल छाउनी ल्याइएको छ।
उद्धारका क्रममा सुरुङबाट एक जनाको शवसमेत निकालिएको छ। सुरुङभित्र थप व्यक्ति फसेको हुनसक्ने भन्दै खोज तथा उद्धार कार्य जारी राखिएको छ।
त्रिशूली–३ बी जलविद्युत् आयोजनामा नेपाली सेनाका ८९, गैरसैनिक ३ जना तथा आयोजनाका प्रबन्ध निर्देशकसहितको टोलीले खोज तथा उद्धार गरिरहेको छ।
आयोजनाको कार्यालय तथा आवास रहेको क्षेत्रमा करिब १५ फिट गहिरो खाडल खनेर खोजी गरिए पनि हालसम्म केही फेला परेको छैन। त्रिशूली–३ ए सँग जोडिने मार्ग खुलाउन एक्साभेटरको प्रयोग गरी करिब ७ सय मिटर बाटो सफा गरिएको नेपाली सेनाले जनाएको छ।
लाङटाङ हाइड्रोपावरको सुरुङमा नेपाली सेनाका २५ तथा दुई गैरसैनिकसहितको संयुक्त टोली प्रवेश गरी खोजी गर्दा दुई वटा शव फेला पारेको छ। त्यहाँ पनि थप खोज तथा उद्धार कार्य जारी रहेको जनाइएको छ।
चिलिमे हाइड्रोपावरमा विदेशी प्राविधिकसहितको संयुक्त टोलीले जेनेरेटर र पम्पको प्रयोग गरी सुरुङभित्र जमेको लेदो हटाउने काम गरिरहेको छ। लेदो हटाउँदै टोली पुनः सुरुङभित्र करिब १ सय मिटरसम्म प्रवेश गरेको छ।
माथिल्लो त्रिशूली–१ को हाकुस्थित सुरुङमा नेपाली सेनाका १७ जना तथा आयोजनाका प्रतिनिधिसहितको टोलीले र्याफ्ट र डुङ्गाको प्रयोग गरेर खोजी गरिरहेको छ। सुरुङभित्र जमेको पानी बाहिर निकाल्ने कामसमेत भइरहेको छ।
नुवाकोटको देवीघाटस्थित तादी नदीमा पुल जडानका लागि नेपाली सेनाको इन्जिनियरिङ फौजका ५५ जना खटिएको पनि निर्देशनालयले जनाएको छ ।
टोलीले पुल निर्माणका लागि बेस तयार गरिरहेको छ। गजुरीमा रहेको एक्रो ब्रिजका केही सामग्री देवीघाट पुर्याइएको छ भने थप सामग्री ढुवानी भइरहेको जनाइएको छ।
प्रकाशित मिति: शुक्रबार, भदौ १९, २०८३
