काठमाडौँ । चीनको सिचाङ (तिब्बत) स्वायत्त क्षेत्र सरकारले नेपालको भोटेकोशी बाढी प्रभावित क्षेत्रमा जोड्नका लागि १ सय मिटर लम्बाइका २ वटा बेलीब्रिज सामग्रीहरू हस्तान्तरण गरेको छ।
ल्हासास्थित नेपाली महावाणिज्य दूतावासमा आयोजित हस्तान्तरण समारोहमा महावाणिज्यदूत लक्ष्मीप्रसाद निरौला र जनवादी गणतन्त्र चीनको सिचाङ स्वायत्त क्षेत्रको विदेश मामिला कार्यालयका उपमहानिर्देशक औयाङ च् पिङबीच हस्तान्तरण प्रमाणपत्रमा हस्ताक्षर गरी आदानप्रदान भएको हो ।
महावाणिज्य दूतावासले हालै आएको भोटेकोशी बाढी प्रभावित क्षेत्रका लागि ३० वटा बेली ब्रिजहरू उपलब्ध गराउन सिचाङ स्वायत्त क्षेत्रको विदेश मामिला कार्यालयलाई अनुरोध गरेको थियो।
महावाणिज्य दूतावासका अनुसार माथिल्लो मुस्ताङको कोरोला (लिजी) सीमा बिन्दुमा पुगेका सामग्रीहरू नेपाल पक्षले आजै प्राप्त गर्नेछ।
पुलहरूको प्रभावकारी र सहज स्थापनाको लागि चीन पक्षले प्राविधिक कर्मचारीहरू पनि पठाएको छ। ती प्राविधिकहरू चाँडै नेपाल पुग्ने जनाइएको छ।
कार्यक्रममा ल्हासास्थित नेपालको महावाणिज्य दूतावास र जनवादी गणतन्त्र चीनको सिचाङ स्वायत्त क्षेत्रको विदेश मामिला कार्यालयका अधिकारीहरू उपस्थित थिए।
प्रकाशित मिति: शुक्रबार, भदौ १९, २०८३
