हेनुवाकोट । यही भदौ १० मा आएको रसुवा बाढीका कारण प्रभावित २ सयभन्दा धेरैलाई नेशनल हेल्पिङ फाउन्डेसन नेपाल र कौशलटार महिला बचत तथा ऋण सहकारी संस्था लिमिटेडबीचको सहकार्यमा राहत वितरण गरिएको छ ।
बाढी प्रभावित जिल्ला नुवाकोटको विदुरमा पुगेर दाल, चामल, तेल, लत्ताकपडा, स्यानेटरी प्याड, डाइपर, धुलो दूध, बालबालिकाको लागि कपडा र स्वास्थ्य सामग्री राहत स्वरुप वितरण गरिएको कौशलटार महिला बचत तथा ऋण सहकारी संस्थाका निवर्तमान अध्यक्ष तथा सल्लाहकार संयोजक सावित्री थापाले जानकारी दिनुभयो ।
उहाँका अनुसार एक लाख ६१ हजार रुपैयाँ बराबरको राहत सामग्री वितरण गरिएको हो ।
नुवाकोटको विदुर नगरपालिका वडा नम्बर १० मा रहेको सुन्दरी केउरिनी माध्यमिक विद्यालयमा सञ्चालन गरिएको होल्डिङ सेन्टरका २ सय भन्दा धेरै बाढी प्रभावित बालबालिकासहितलाई राहत दिइएको हो ।
नेशनल हेल्पिङ फाउन्डेसन नेपालका सदस्य तथा कौशलटार महिला बचत तथा ऋण सहकारी संस्था लिमिटेडका कोषाध्यक्ष सङ्गीता गिरीले स्थानीय सरकार र प्रशासनको समन्वयमा राहत वितरण गरिएको बताउनुभयो ।
उहाँका अनुसार धादिङका बाढी प्रभावितलाई पनि राहत लिएर एक हप्ता भित्र त्यसतर्फ जाने योजना बनाइएको छ ।
प्रकाशित मिति: बुधबार, भदौ १७, २०८३
