काठमाडौँ । राष्ट्रिय आपत्कालीन कार्य सञ्चालन केन्द्रका अनुसार रसुवा बाढीका कारण ज्यान गुमाउनेको सङ्ख्या ४ सय ६९ पुगेको छ ।
केन्द्रका अनुसार आज बिहान साढे ७ बजेसम्म ४ सय ६९ जनाको शव फेला परेको छ भने ९ सय ७७ जना अझै सम्पर्कविहीन छन् । फेला परेका शवमध्ये सबैभन्दा धेरै चितवनमा १ सय ७८ भेटिएका छन् ।
नवलपरासी पूर्वमा १ सय १०, गोरखामा ४४, नवलपरासी पश्चिममा २७, तनहुँमा २८, नुवाकोटमा ३७, धादिङमा ३३ र रसुवामा १२ जनाको शव फेला परेको विवरणमा उल्लेख छ ।
सम्पर्कविहीन हुनेमा विदेशी नागरिकको सङ्ख्या ५ सय १७ रहेको छ ।
नेपाल घुम्न आएका विदेशमा बस्ने नेपाली नागरिक १ सय २७ जना पनि सम्पर्कविहीन रहेको जनाइएको छ । नेपाली सेना ४५, नेपाल प्रहरी २८, सशस्त्र प्रहरी बल नेपाल १३, भन्सार कार्यालयका १५, अध्यागमन कार्यालयका ४ जना तथा रसुवाका १ सय ६१ र मकवानपुरका ६६ जना सम्पर्कविहीन रहेको केन्द्रको भनाइ छ ।
बाढी तथा पहिरोमा परी ७३ जना घाइते भएका छन् । घाइतेमध्ये रसुवाका ४३, नुवाकोटका २७ र धादिङका ३ जना रहेका छन् ।
नेपाली सेना, नेपाल प्रहरी र सशस्त्र प्रहरी बल नेपाल गरी ९ हजार ४०५ जना सुरक्षाकर्मी खोज तथा उद्धारमा परिचालन गरिएको गृह मन्त्रालयले जनाएको छ ।
नेपाली सेनाका ४ हजार २ सय ४३, नेपाल प्रहरीका ३ हजार ३ सय १८ र सशस्त्र प्रहरी बलका १ हजार ८ सय ४४ जना उद्धार तथा प्रतिकार्यमा खटिएका छन् । उद्धार कार्यका लागि नेपाली सेनाका ६ वटा र निजी क्षेत्रका ९ वटा गरी १५ वटा हेलिकप्टर परिचालन गरिएको छ ।
ती हेलिकप्टरमार्फत हालसम्म ३ हजार २५३ जनाको उद्धार गरिएको विवरणमा उल्लेख छ ।
प्रकाशित मिति: शुक्रबार, भदौ १२, २०८३
