काठमाडौँ । भोटेकोशी नदीमा तिब्बततर्फबाट ठूलो बाढी प्रवेश गरेको जनाउँदै जल तथा मौसम विज्ञान विभागअन्तर्गतको बाढी पूर्वानुमान शाखाले उच्च सतर्कता अपनाउन आग्रह गरेको छ।
शाखाले जारी गरेको सूचनाअनुसार, रसुवाको भोटेकोसी नदीमा तिब्बत क्षेत्रबाट अकस्मात ठूलो पानीको बहाव बढेको हो।
यसले त्रिशूली नदीमा समेत असर पर्ने देखिएकाले, त्रिशूली नदीको तटीय क्षेत्र विशेषतः मुग्लिनसम्मका भू–भागमा बस्ने बासिन्दालाई अर्को सूचना नआउँदासम्म सुरक्षित स्थानमा जान शाखाले अनुरोध गरेको छ।
शाखाका अनुसार नदी किनार, डुबान हुन सक्ने स्थान, पुल र बगर क्षेत्रमा हाल गतिविधि नगर्न, र स्थानीय प्रशासन तथा सुरक्षा निकायको निर्देशन पालना गर्नुपर्नेछ ।
रसुवाको भोटेकोशी जलाधार क्षेत्र तिब्बततर्फका हिमतालसँग जोडिएको भएकाले विगतमा पनि यस क्षेत्रबाट ठूला बाढी आउने गरेको छ । यसको प्रत्यक्ष असर तल्लो तटीय क्षेत्र हुँदै त्रिशूली नदीसम्म पुग्ने गरेको छ।
प्रकाशित मिति: बुधबार, भदौ १०, २०८३
