काठमाडौँ । सुनसरीलगायतका जिल्लामा साम्प्रदायिक सद्भाव कायम गर्नका लागि राजनीतिक दलहरूको सहभागिता बढाउन सत्तारूढ राष्ट्रिय स्वतन्त्र पार्टी (रास्वपा) का सभापति रवि लामिछानेले आज बिहान बस्ने गरी सर्वदलीय बैठक बोलाउनुभएको छ ।
बिहान ८ बजे सिंहदरबारमा बस्ने गरी सभापति लामिछानेले सर्वदलीय बैठक आह्वान गरेको रास्वपा महामन्त्री बिपिन आचार्यले जानकारी दिनुभयो ।
उहाँका अनुसार सामाजिक रूपले फैलन सक्ने द्वेष न्यूनीकरण गरी सद्भाव र शान्ति सुरक्षा कायम गर्न प्रशासनिक प्रयास जारी रहँदा राजनीतिक रूपमा पनि सामूहिक सन्देश र अपिलको आवश्यकता बोध भएकाले सर्बदलीय बैठक बोलाइएको हो ।
बैठकमा सहभागी हुनका लागि सबै दललाई पत्राचार गरिएको र सभापति लामिछानेले नेताहरूलाई आफै फोन गरेर आमन्त्रण गर्नुभएको आचार्यले बताउनुभयो ।
यसैबीच प्रधानमन्त्री वालेन्द्र शाह (बालेन) ले सुनसरी घटनाको सुरुआतदेखि नै सरकारले आफ्नो उपस्थिति देखाएको जनाउँदै सद्भाव बिग्रने कुनै पनि गतिविधिमा संलग्न नभइदिन सरोकारवाला सबैमा अनुरोध गर्नुभएको छ ।
हिजो सामाजिक सञ्जालमार्फत एक सन्देश सार्वजनिक गर्दै प्रधानमन्त्री शाहले सुनसरी घटनाका कसुरदारहरूलाई कानुन बमोजिम कारबाही गर्ने प्रतिबद्धता पनि जनाउनुभएको छ ।
सम्पूर्ण घटनाका बारेमा सरकारले गम्भीर भएर समीक्षा गरेको उल्लेख गर्दै प्रधानमन्त्री बालेनले मृतकका परिवार, घाइते तथा घाइतेका परिवारहरूलाई न्यायको अनुभूति गराउन सरकारले आफ्नो पूरा शक्ति लगाउने वाचा गर्नुभएको छ ।
आफ्नो उत्तेजना, आक्रोश, बदलाको भावनालाई रोक्दै उत्तेजित हुने वा गराउने कुनै पनि काममा सरिक नभइदिन अपिल गर्दै प्रधानमन्त्री शाहले एकअर्कालाई प्रेम र सम्मान गर्दै सामाजिक सदभाव कायम राख्न अनुरोध गर्नुभएको छ ।
यसैबीच नेपाली काँग्रेसका सभापति गगन थापाले साम्प्रदायिक सद्भावका लागि संयमता अपनाउनु सबैभन्दा महत्वपूर्ण रहेको बताउनुभएको छ ।
सामाजिक सञ्जालमार्फत जारी एक भिडिओ सन्देशमा सभापति थापाले घटनाका बारेमा सरकारसँग आफूहरुले प्रश्न सोध्ने र सरकारलाई थप जिम्मेवार बनाउने प्रतिबद्धता जनाउँदै उत्तेजना फैलाउने कुनै पनि गतिविधि कसैले पनि नगर्न अनुरोध गर्नुभएको छ ।
प्रकाशित मिति: बुधबार, साउन १३, २०८३
