काठमाडौं । सरकारले नेपाल टेलिकमको ४४ प्रतिशत सेयर सर्वसाधारणका लागि खुला गर्ने घोषणा गरेको छ ।
अर्थमन्त्री डा. स्वर्णिम वाग्लेले आगामी आर्थिक वर्ष २०८३/८४ को बजेट प्रस्तुत गर्दै ६६ प्रतिशत सेयर सरकारकै स्वामित्वमा रहने र बाँकी सेयर आगामी पुस मसान्तभित्र बिक्री गरिने जानकारी दिनुभयो ।
सरकारले सेयर बिक्रीबाट उठ्ने रकम प्रविधि क्षेत्रको विकासमा खर्च गर्ने जनाएको छ । विशेषगरी नेपाललाई ‘टेक हब’का रूपमा विकास गर्न उक्त रकम उपयोग गरिने अर्थमन्त्री वाग्लेकाे भनाइ छ ।
तीन महिनाको इन्धन भण्डारण गर्ने तयारी, एआई फ्याक्ट्री पनि बन्ने
सरकारले देशमा कम्तीमा तीन महिनासम्म पुग्ने इन्धन भण्डारणको व्यवस्था गर्न ‘मातृभूमि कोष’ स्थापना गर्ने घोषणा गरेको छ ।
आगामी आर्थिक वर्ष २०८३/८४ को बजेट प्रस्तुत गर्दै अर्थमन्त्री डा. स्वर्णिम वाग्लेले ऊर्जा सुरक्षालाई ध्यानमा राख्दै यस्तो योजना अघि सारिएको बताउनुभयाे ।
सरकारले कृत्रिम बुद्धिमत्ता (एआई) सम्बन्धी पूर्वाधार विकासका लागि ‘एआई फ्याक्ट्री’ स्थापना गर्ने योजना पनि सार्वजनिक गरेको छ ।
अर्थमन्त्री डा. वाग्लेकाअनुसार इन्धन भण्डारण क्षमतामा वृद्धि हुँदा आपूर्ति संकटको समयमा राहत पुग्ने अपेक्षा गरिएको छ भने एआई फ्याक्ट्रीले नेपालमा प्रविधि र नवप्रवर्तन क्षेत्रको विकासमा टेवा पुर्याउनेछ ।
प्रकाशित मिति: शुक्रबार, जेठ १५, २०८३
