मुगु। हिमाली जिल्ला मुगुमा यर्सा संकलन यहि जेठ १३ गतेदेखि खुला गरिने भएको छ।
जिल्लाकाे पुर्वी भेगमा पर्ने मुगुम कार्मारोङ गाउँपालिकामा रहेका एक दर्जन बढि विभिन्न पाटनका क्षेत्रहरुमा पाइने बहुमूल्य जडीबुटी यार्चागुम्बा जेठ १३ देखि एक महिनाका लागि यार्सा संकलन प्रवेश खुला गरिने भएको हो।
मुगुम कार्मारोङ गाउँ कार्यपालिकाको बैठकले जेठ १३ गतेबाट यार्चा संकलन सुरु गर्ने निर्णय गरेको पालिकाले जनाएको छ। जिल्ला बाहिरकालाई प्रतिव्यक्ति दुई हजार ५ सय र जिल्लाभित्रकालाई २ हजार रुपैयाँ प्रवेश शुल्क निर्धारण गरिएको गाउँपालिकाका प्रमुख प्रशासकिय अधिकृत सुवाष रावलले बताउनुभयो ।
प्रवेश शुल्क नतिरेर लुकीचोरी यार्सा टिप्ने जो कोहीलाई कारबाही गरिने पालिकाले जनाएकाे छ।
यार्सा संकलनका समयमा सिसा प्लास्टिकजन्य वस्तु नफाल्न र जथाभावी रुख बिरुवा नकाट्न र चोरी नगर्न समेत आग्रह गरिएको छ। यसअघि गाउँपालिकाको आधिकारिक सूचनाअघि नै यार्सागुम्बा चोरी गर्न गएका २५ जनालाई जिल्ला प्रहरी कार्यालय मुगुले नियन्त्रणमा लिएको थियो।
यार्सा टिप्न कर्णाली सहित सुदुरपश्चिमका जिल्लाहरूबाट संकलकहरु आउने गर्दछन् ।
प्रकाशित मिति: आइतबार, जेठ ३, २०८३
