सल्यान । सल्यानमा एकै स्थानमा ठूलो परिमाणमा विस्फोटक पदार्थ फेला परेको छ।
जिल्ला प्रहरी कार्यालय सल्यानको परिसरभित्र भवन निर्माणका लागि जग खन्ने क्रममा उक्त विस्फोटक सामग्री फेला परेको हो।
प्रहरीका अनुसार वैशाख १६ गते दिउँसो करिब १२:३५ बजे शारदा नगरपालिका–३ स्थित प्रहरी कार्यालय परिसरमा उत्खननका क्रममा सकेट बम जस्तो देखिने शंकास्पद वस्तु भेटिएको थियो।
घटनालगत्तै नेपाली सेनाको सिद्धीबक्स गणसँग समन्वय गरी प्रहरी नायव उपरीक्षक डा. हेम बहादुर के.सी.को कमाण्डमा १० जनाको प्रहरी टोली परिचालन गरिएको थियो।
त्यसपछि उप सेनानी कृष्णा क्षेत्रीको नेतृत्वमा नेपाली सेनाको टोली घटनास्थलमा पुगेको थियो। प्रारम्भिक रूपमा १० वटा सकेट बम फेला परेपछि थप विशेषज्ञ टोली झिकाइएको थियो।
मध्यपश्चिम पृतना अन्तर्गत दाङस्थित १९ नम्बर बाहिनीबाट बम डिस्पोजल टोली समेत परिचालन गरिएको थियो।
थप उत्खननका क्रममा आज बिहान ११ बजेसम्म कुल ८६ वटा बम फेला परेका छन्।
तीमध्ये ८२ वटा सकेट बम, ३ वटा सुतली बम र १ वटा बोतल बम रहेको प्रहरीले जनाएको छ। यसका साथै घटनास्थलबाट ७ थान रेडियो वेभ उपकरण, करिब ५०० ग्राम विस्फोटक पदार्थ, २ केजी बराबर बम बनाउन प्रयोग हुने सामग्री र १० मिटर फायरिङ केबल समेत बरामद गरिएको छ।
फेला परेका सबै विस्फोटक पदार्थ सुरक्षित रूपमा डिस्पोज गर्ने कार्य जारी रहेको जिल्ला प्रहरी कार्यालय सल्यानका प्रहरी नायव उपरीक्षक डा. हेम बहादुर के.सी.ले जानकारी दिनुभयो ।
प्रकाशित मिति: शनिबार, वैशाख १९, २०८३
