सल्यान । बागचौर नगरपालिका–४, नमुना बस्तीमा विद्युत् सर्टका कारण भएको आगलागीमा एक वृद्धको मृत्यु भएको छ।
अाज साँझ करिब पौने पाँच बजे स्थानीय भद्रबहादुर घर्तीको बाख्राको खोरमा विद्युत् तार सर्ट भई आगलागी हुँदा सोही खोरमा सुतिरहेका ७० वर्षीय मोतिराम वलीको जलेर मृत्यु भएको हो।
स्थानीयका अनुसार मोतिराम वली नजिकै आफन्तको बिहेमा सहभागी हुन गएका थिए। गर्मीका कारण उहाँ बिहे घर नजिकै रहेको टहरामा सुतिरहेका बेला अचानक आगलागी भएको थियो ।
आगलागीबाट खोरमा रहेका करिब ३५ वटा लोकल कुखुरा समेत जलेर नष्ट भएका छन्। घटनाबारे जानकारी दिँदै बागचौर नगरपालिका–४ का वडा अध्यक्ष कृष्णा बस्नेतले आगलागी विद्युत् सर्टका कारण भएको प्रारम्भिक अनुमान रहेको र थप अनुसन्धान भइरहेको बताउनुभयो।
प्रकाशित मिति: मंगलबार, वैशाख ८, २०८३
