सल्यान । सल्यानमा विहेको जन्ती लिएर जाँदै गरेको जिप दुर्घटनामा पर्दा चार जनाको मृत्यु भएको छ भने १४ जना घाइते भएका छन् ।
जिल्लाको बन्गाड कुपिण्डे नगरपालिका ८ थारादेखि कालिमाटी गाउँपालिका १ लक्ष्मीपुर जाँदै गरेको लु.प्र. ००१ ज ०२७१ नम्बरको जिप हिजो साँझ बन्गाड कुपिण्डे नगरपालिका १२ धाईरेमा दुर्घटनामा पर्दा तीन जनाको घटनास्थलमै मृत्यु भएको हो ।
मृत्यु हुनेमा थाराकै वर्ष ५२ का टोपबहादुर थापा, ठगे घर्ती र २९ वर्षका का कर्णबहादुर पुन अनि बनगाड कुपिण्डे नगरपालिका ८ का ३० वर्षका मानबहादुर थापा रहनुभएको प्रहरीले जनाएको छ ।
सडकको अवस्था राम्रो नहुँदा जिप दुर्घटनामा परेको वडा अध्यक्ष कुलबहादुर पुरीले बताउनुभयो ।
दुर्घटनामा गम्भीर घाइते सबैलाई तत्काल उद्धार गरेर सुर्खेतको मेहलकुना अस्पताल पठाइएको जिल्ला प्रहरी कार्यालय सल्यानले जनाएको छ ।
प्रहरी निरिक्षक देवराज भटराईले घाइते १४ मध्ये ५ जनाको अवस्था गम्भीर रहेको जानकारी दिनुभयो ।
प्रकाशित मिति: आइतबार, वैशाख ६, २०८३
