सल्यान । सल्यानमा बदर मत कम गर्ने उद्देश्यले सञ्चालन गरिएको मतदाता शिक्षा कार्यक्रम प्रभावकारी भएको स्थानीयबासीको भनाइ छ ।
मतदाताहरूले कार्यक्रमबाट मतदान गर्दा ध्यान दिनुपर्ने महत्वपूर्ण विषयमा जानकारी पाएका छन् भने बदर मतको सङ्ख्या यसपाली घट्ने पनि उनीहरूको विश्वास रहेको छ ।
निर्वाचनलाई स्वच्छ, निष्पक्ष र व्यवस्थित बनाउन निर्वाचन आयोगको नीति र योजना अनुसार जिल्ला निर्वाचन कार्यालयहरूले सुरु गरेको मतदाता शिक्षा कार्यक्रम यही फागुन १७ मा सकियो ।
यो अभियानका क्रममा सिकाइएको विधि र अभ्यासले मतदातालाई मतदान गर्ने तरिकाबारे थप स्पष्ट बनाएको सल्यानको कपुरकोट गाँउपालिका ४ का एलिसा गिरी थापाको भनाइ छ ।
स्थानीय हेमराज घर्तीको विचार पनि उहाँको जस्तै छ । गाउँघरमै पुगेर सही तरिकाले भोट हाल्ने विधिका बारेमा जानकारी गराउँदा आत्मविश्वास पनि बढेको उहाँको भनाइ छ ।
मतदाता शिक्षा अन्तर्गत मतदान गर्ने तरिका, मतपत्र प्रयोग गर्ने विधि तथा मत बदर हुन नदिन ध्यान दिनुपर्ने विषयमा नागरिकलाई जानकारी दिइएको मतदाता शिक्षा स्वयंसेविका बिमला शर्माले बताउनुभयो ।
जिल्ला निर्वाचन कार्यालय सल्यानका अनुसार २०७९ सालको निर्वाचनमा जिल्लामा प्रत्यक्षतर्फ ८.८१ र समानुपातिकतर्फ ७.३३ प्रतिशत मत बदर भएको थियो ।
सदर मत बढाउने लक्ष्यसहित प्रत्येक वडामा मतदाता शिक्षा कार्यक्रम यसपाली सञ्चालन भएको जिल्ला निर्वाचन अधिकारी धीरेन्द्र भण्डारीले जानकारी दिनुभयो ।
मतदाता शिक्षासँगै सल्यानमा समग्र निर्वाचनलाई शान्तिपूर्ण, निष्पक्ष र भयरहित वातावरणमा सम्पन्न गर्न आवश्यक सुरक्षा तथा प्रशासनिक तयारी पनि सल्यानमा तीव्र पारिएको साहयक प्रमुख जिल्ला अधिकारी हरिसचन्द्र शर्माको भनाइ छ ।
यही फागुन २१ को निर्वाचनका लागि सल्यान जिल्लामा २ सय ५ मतदान केन्द्र तोकिएका छन् भने जिल्लामा जम्मा मतदाता १ लाख ६२ हजार ४४९ रहेको छ ।
४३ वटा मतदानस्थल अति संवेदिनशील मानेर त्यसै अनुसारको सुरक्षा सतर्कता अपनाइएको प्रहरी प्रशासनको भनाइ छ ।
प्रकाशित मिति: मंगलबार, फागुन १९, २०८२
