सर्लाही । सर्लाहीको मलंगवा नगरपालिका–१० मा डेरा गरी बस्दै आएका जिल्ला पूर्वाधार विकास कार्यालय सर्लाहीमा कार्यरत सब–इन्जिनियर प्रमोद कुमार यादवको हत्या प्रकरणमा संलग्न तीन जनालाई जिल्ला प्रहरी कार्यालय सर्लाहीले सार्वजनिक गरेको छ ।
आज पत्रकार सम्मेलन गरेर उनीहरूलाई सार्वजनिक गरेको हो ।
जिल्ला प्रहरी कार्यालय सर्लाहीका अनुसार फागुन ३ गते साँझ करिब ७ः५५ बजे फोन गरी डेरा बाहिर बोलाइएका ३६ वर्षीय यादवमाथि अज्ञात व्यक्तिले गोली प्रहार गरेका थिए । गोली लागेर गम्भीर घाइते यादवलाई तत्कालै प्रादेशिक अस्पताल मलंगवा लगिएकोमा उपचारको क्रममा मृत्यु भएको थियो ।
पोस्टमार्टम रिपोर्टमा छातीमा लागेको गोली नै मृत्युको कारण रहेको उल्लेख गरिएको प्रहरीले जनाएको छ ।
प्रहरी अनुसन्धानका क्रममा महोत्तरी रामगोपालपुर नगरपालिका ५ घर भएका ३४ वर्षीय गणेश कुमार महतो घटनाका मुख्य योजनाकार रहेको खुलेको छ ।
उनी प्रदेश लोक सेवा आयोग, मधेश प्रदेशबाट सब–इन्जिनियर पदमा वैकल्पिक उम्मेदवार रहेका थिए भने मृतक यादव सो पदका मुख्य सिफारिस उम्मेदवार थिए ।
प्रहरीका अनुसार मुख्य उम्मेदवारको मृत्यु भए वा पद रिक्त भएमा वैकल्पिक उम्मेदवारले स्थायी नियुक्ति पाउने प्रावधानको फाइदा उठाउन महतोले योजनाबद्ध रूपमा हत्या गराएको खुलेको छ ।
घटनामा संलग्न आरोपमा प्रहरीले वर्ष २२ चन्द्र किशोर सिंह कुशवाहा र वर्ष २२ विजय कुमार महतोलाई पनि पक्राउ गरेको छ ।
विजय महतोले करिब ८० हजार रुपैयाँमा हतियार खरिद गरी उपलब्ध गराएको र चन्द्र किशोरले योजनामा सहयोग गरेको प्रहरीले जनाएको छ ।
अनुसन्धानका क्रममा गणेश महतोले ‘राकेश यादव’ नाम प्रयोग गरी मृतकसँग सम्पर्क गर्दै आएका थिए ।
घटनाको दिन उनले व्हाट्सएप कल गरेर बाहिर बोलाएपछि आफूसँग रहेको पेस्तोलबाट गोली प्रहार गरी फरार भएका थिए ।
लिल्ला प्रहरी कार्यालयले घटनामा प्रयोग भएको पेस्तोल, गोलीको खोका, भारतीय नम्बर प्लेटको मोटरसाइकल र तीन वटा मोबाइल फोन बरामद गरेको जनाएको छ ।
पक्राउ परेका तीनै जनाविरुद्ध कर्तव्य ज्यान तथा हातहतियार सम्बन्धी कसुरमा मुद्दा दर्ता गरी १० दिन भ्याद थप गरि अनुसन्धान भइरहेको जिल्ला प्रहरी कार्यालय सर्लाहीका प्रवक्ता एवं डीएसपी सरोज राईले जानकारी दिनुभयो ।
प्रकाशित मिति: शुक्रबार, फागुन १५, २०८२
