सर्लाही । सर्लाहीको लालबन्दी नगरपालिकामा गाईभैँसीमा लम्पी स्किन रोग देखिन थालेपछि नगरपालिकाले किसानलाई सतर्कता अपनाउन आग्रह गरेको छ। नगरपालिकाले रोगको जोखिम बढ्न थालेपछि खोप अभियानसमेत सुरु गरेको जनाएको छ।
नगरपालिकाको पशु शाखाका प्रमुख डा. बिमल श्रेष्ठका अनुसार हाल लालबन्दीका केही पशुमा लम्पी स्किन रोग देखिएको छ। रोग नियन्त्रणका लागि भेटेरिनरी अस्पताल तथा पशु सेवा विज्ञ केन्द्र सर्लाहीबाट प्राप्त २ हजार भाइल लम्पी स्किन रोगविरुद्धको खोप पहिलो चरणमा उपलब्ध भएकाले व्यावसायिक रूपमा पशुपालन गर्ने किसानका गाईभैँसीमा खोप लगाउने काम सुरु गरिएको उहाँले बताउनुभयो ।
उहाँकाअनुसार एक साताभित्र अधिकांश गाईभैँसीलाई खोप लगाउने तयारी गरिएको छ। लम्पी स्किन रोगका लक्षणमा उच्च ज्वरो आउने, छालामा गिर्खा वा गोटी देखिने, जोर्नी सुन्निने, मासपेशी दुख्ने तथा पशुले खाना खान छोड्ने लगायतका समस्या देखिने पशु चिकित्सकहरूले बताएका छन् । यस्ता लक्षण देखिएमा तुरुन्तै पशु चिकित्सकसँग सम्पर्क गर्न नगरपालिकाले आग्रह गरेको छ।
लम्पी स्किन रोग झिँगा, लामखुट्टेजस्ता किराहरू, संक्रमित पशुसँगको प्रत्यक्ष सम्पर्क तथा गोठको फोहोर वातावरणका कारण फैलिने भएकाले गोठको सरसफाइमा विशेष ध्यान दिन पशु चिकित्सकहरूले सुझाव दिएका छन् ।
नगरपालिकाले गाईभैँसीमा अनिवार्य खोप लगाउन, गोठमा फिनायल तथा न्यूट्रल लिक्विडजस्ता कीटनाशक प्रयोग गर्न र संक्रमित पशुलाई अन्य पशुभन्दा अलग राख्न किसानलाई आग्रह गरेको छ ।
त्यस्तै, मरेका पशुलाई गहिरो खाल्डो खनेर गाड्न, गोठमा नयाँ पशु ल्याउँदा कम्तीमा २८ दिन अलग राखेर निगरानी गर्न तथा पशु ओसारपसार गर्दा अनिवार्य स्वास्थ्य प्रमाणपत्र प्रयोग गर्न निर्देशन दिइएको छ ।
नगर प्रमुख बासुदेव अधिकारीका अनुसार वडावडामा पशु प्राविधिक परिचालन गरी रोगको जोखिम मूल्याङ्कन, खोप अभियान तथा उपचार कार्य अघि बढाइएको छ ।
नगरपालिकामा व्यावसायिक रूपमा मात्रै करिब ५ हजारदेखि ५ हजार ५ सयसम्म गाईभैँसी पालिएको अनुमान गरिएको छ । गाउँघरमा घरायसी प्रयोजनका लागि पालिएका पशुसमेत जोड्दा करिब १२ हजारको हाराहारीमा पशुपालन भइरहेको पशु शाखाले जनाएको छ ।
महामारीकै रूपमा रोग फैलिन नदिन केही पशुपालक किसानका गोठमा रोग देखिएलगत्तै नियन्त्रण तथा खोप अभियान सुरु गरिएको नगरपालिकाले जनाएको छ ।
प्रकाशित मिति: शनिबार, जेठ ९, २०८३
