सल्यान । सल्यानको कपुरकोट गाउँपालिका–३ चोर खोलास्थित राप्ती राजमार्गमा जिप दुर्घटना हुँदा चालकको घटनास्थलमै मृत्यु भएको छ भने तीन जना घाइते भएका छन्।
आज बिहान साढे ५ बजे रुकुम पूर्वबाट दाङतर्फ जाँदै गरेको ग १ ज ५६६१ नम्बरको जिप अनियन्त्रित भई करिब ४०० मिटर तल खसेको प्रहरीले जनाएको छ।
दुर्घटनामा चालक रुकुम पूर्व सिस्ने गाउँपालिका–४ अमलाचौर निवासी ३० वर्षीय विजय विश्वकर्माको घटनास्थलमै मृत्यु भएको जिल्ला प्रहरी कार्यालय सल्यानका प्रहरी प्रमुख डा हेम केसीले जानकारी दिनुभयो ।
दुर्घटनामा सवार अन्य तीन जना घाइते भएका छन्। घाइते हुनेमा रुकुम पूर्व सिस्ने गाउँपालिका–२ की २२ वर्षीया सुश्मि रोका, उहाँकी २ वर्षीया छोरी सफलता केसी र सिस्ने गाउँपालिका–४ की ३८ वर्षीया ललिता केसी रहेको प्रहरीको भनाइ छ ।
सुश्मि रोका र बालिका सफलताको निधार तथा खुट्टामा सामान्य चोट लागेको छ भने ललिता केसीको शरीरका विभिन्न भागमा मध्यम चोट लागेको केसीले बताउनुभयो ।
घटनापछि प्रहरीले घाइतेहरुको उद्धार गरी प्रारम्भिक उपचारका लागि कपुरकोट स्थानीय स्वास्थ्य चौकी पठाएको थियो। पछि थप उपचारका लागि तीनै जनालाई जे प्रादेशिक अस्पताल तुलसीपुर, दाङ रिफर गरिएको प्रहरीले जनाएको छ।
प्रकाशित मिति: बुधबार, माघ २८, २०८२
