सर्लाही। सर्लाहीको हरिपुर नगरपालिका २ स्थित ग्रामीण नारी उत्थान संघको आयोजनामा सिमान्तकृत दलित तथा मुसहर समुदायका ४४२ घरधुरीलाई ५७६ थान न्यानो कम्बल वितरण गरिएको छ ।
अस्ती ग्रामीण नारी उत्थान संघ हरिपुर–२ सर्लाही र सेभ द चिल्ड्रेनको आर्थिक सहयोग तथा हरिपुर नगरपालिकाको सहकार्य र समन्वयमा उक्त कार्यक्रम सम्पन्न गरिएको हो । कार्यक्रम हरिपुर नगरपालिका वडा नम्बर १, २, ४, ५, ७, ८ र ९ का मुसहर तथा दलित समुदाय लक्षित थियो ।
ग्रामीण नारी उत्थान संघकी अध्यक्ष गोमा देवी न्यौपानेको अध्यक्षतामा सम्पन्न कार्यक्रममा हरिपुर नगरपालिकाकी उपप्रमुख निलम राय यादव प्रमुख अतिथिका रूपमा उपस्थित हुनुहुन्थ्यो । साथै संस्थाका पदाधिकारी, कर्मचारी, इलाका प्रहरी कार्यालय हरिपुरका प्रतिनिधि तथा स्थानीय समुदायको सहभागिता रहेको थियो ।
कार्यक्रममा बोल्दै नगर उपप्रमुख यादवले जाडोयाममा न्यानो कम्बलले सिमान्तकृत समुदायलाई राहत पुग्ने विश्वास व्यक्त गर्नुभयो। उहाँले अभिभावकहरूलाई आफ्ना बालबालिकाको शिक्षा, स्वास्थ्य र सुरक्षामा विशेष ध्यान दिन आग्रहसमेत गर्नुभयो ।
संस्थाकी अध्यक्ष न्यौपानेले विगत वर्षहरूदेखि नै सिमान्तकृत दलित, मुसहर तथा अल्पसंख्यक समुदायका बालबालिका, अपांगता भएका व्यक्ति, गर्भवती तथा सुत्केरी महिला र ज्येष्ठ नागरिकलाई लक्षित गर्दै न्यानो कम्बल वितरण कार्यक्रम निरन्तर सञ्चालन गर्दै आएको बताउनुभयो । कम्बल वितरणसँगै बाल संरक्षण, स्वास्थ्य सचेतना, व्यक्तिगत सरसफाइ र विद्यालय पहुँच विस्तारमा समेत संस्थाले काम गर्दै आएको उहाँको भनाइ थियो ।
कार्यक्रममा गर्भवती तथा सुत्केरी महिला, अपांगता भएका व्यक्ति र ज्येष्ठ नागरिकलाई पहिलो प्राथमिकतामा राखी कम्बल वितरण गरिएको थियो । वडास्तर तथा स्थानीय तहबाट प्रमाणित तथ्यांकका आधारमा जिल्ला विपद् व्यवस्थापन समितिको अनुमति लिएर कार्यक्रम संस्थाको प्रांगणमा सम्पन्न गरिएको सस्थाले जनाइएको छ ।
प्रकाशित मिति: बुधबार, पुस १६, २०८२
