सल्यान । ग्रामिण विकास सञ्चार केन्द्रको चौथो अधिवेशन तथा १७ औं साधारण सभा सम्पन्न भएको छ। यही अवसरका बीच रेडियो शारदा एफएम ९९ दशमलब २ मेगाहर्जले १७ वर्षपछि पहिलोपटक आफ्नै भवनबाट सेवा सुरू गरेको छ। भवनको उद्घाटन कर्णाली प्रदेशका पूर्वमन्त्री तथा सांसद भीमप्रकाश शर्माले गर्नुभएको हो ।
उद्घाटन समारोहमा बोल्दै पूर्वमन्त्री शर्माले सामुदायिक रेडियोले सामाजिक रुपान्तरणमा महत्वपूर्ण भूमिका खेल्दै आएको बताएउनुभयो । प्रविधि परिवर्तन भए पनि रेडियोको प्रभाव अझै पनि बलियो रहेको उहाँको भनाइ थियो। उहाँले रेडियोका कार्यक्रमहरूमा राजनीतिक विषयसँगै आर्थिक उत्पादन र विकासलाई पनि प्राथमिकता दिनुपर्ने सुझाव दिनुभयो ।
शारदा नगरपालिकाकी उपप्रमुख सुस्मिता सापकोटाले स्थानीय सरकार सञ्चारमाध्यमसँग सहकार्य गर्न तत्पर रहेको बताउनुभयो । उहाँका अनुसार स्थानीय सरकारले गरेका काम कारबाही जनतासमक्ष पु¥याउन सञ्चारमाध्यम प्रभावकारी सहयोगी बन्न सक्छन्।
सल्यानका निमित्त प्रमुख जिल्ला अधिकारी हरिशचन्द्र शर्माले विकास भौतिक मात्र नभई मानविय पक्षसँग जोडिनुपर्ने धारणा राख्नुभयो । चुनौतीपूर्ण परिस्थितिमा आफ्नै भवन निर्माण गरी रेडियो सञ्चालन गर्नु संस्थाको उल्लेख्य उपलब्धि भएको बताउनुभयो ।
कार्यक्रममा जिल्ला हुलाक अधिकृत चिन्तामणी रेग्मी, पत्रकार महासंघ सल्यानका अध्यक्ष डिल्लीराज रावत, रेडियो राप्तीका अध्यक्ष रमेश कुमार गौतमलगायतले सामुदायिक रेडियोका भूमिका, चुनौती र सम्भावनाबारे विचार व्यक्त गर्नुभएको थियो ।
सरकारी र गैर सरकारी संस्थाका प्रतिनिधि तथा स्थानीयको उपस्थितिमा सम्पन्न कार्यक्रममा सार्वजनिक गरिएको जानकारीअनुसार रेडियो शारदा एफएमको भवन सरकारी सहयोग र संस्थागत स्रोतसाधन सहित करिब ८३ लाख रुपैयाँमा निर्माण गरिएको हो।
प्रकाशित मिति: आइतबार, मंसिर २१, २०८२
