सल्यान । शारदा नगरपालिका ५ तल्लो मार्केमा रहेको श्री जनकल्याण प्राथमिक विद्यालयको छात्रावासमा अध्ययनरत असहाय छात्रछात्राका लागि खाद्यान्न तथा कपडा सहयोग वितरण गरिएको छ।
समाजसेवी टेकराज शाहिले आफ्नो जन्मदिनको अवसर पारेर छात्रावासमा बस्ने बालबालिकालाई चामल ५० किलो, खाने तेल ५ लिटर, अण्डा १ क्यारेकोट तथा नुन ३ पोका सहयोग गर्नुभएको हो। त्यस्तै पूर्व सांसद नेत्रलाल श्रेष्ठले ७ थान ब्लाङ्केट प्रदान गर्नुभयो भने रोषण फलफूल पसलले ५ दर्जन केरा वितरण गरेको छ।गङ्गाराम रोकाले विद्यालयका विद्यार्थीहरूको आवासका लागि आफ्नो घर उपलब्ध गराउँदै आउनुभएको छ ।
यो भन्दा अगाडी पनि शारदा नगरपालिका र सहायक प्रधानाध्यापक कृष्ण ओलीको पहलमा विभिन्न ब्याक्ती समूह र सस्थाहरुले खाद्यान्न र कपडा स्टेसनरी सामाग्री बितरण गर्दै आएका छन ।
शारदा नगरपालिकाले जिल्लामै पहिलोपटक सामुदायिक विद्यालयमै छात्रावाससहितको शिक्षा सेवा सञ्चालन गरेको जनाउँदै हाल सो छात्रावासमा ३१ जना असहाय बालबालिका सहित ९३ जना उक्त विद्यालयमा अध्ययनरत रहेको जानकारी दिएको छ ।
नगरपालिकाको १० लाख रुपैयाँ लगानी र स्थानीय जनश्रमदानमा छात्रावासका लागि आफ्नै भवन निर्माण कार्य सुरु भइसकेको नगरप्रमुख प्रकाश भण्डारीले बताउनुभयो। उहाँका अनुसार एक समय बन्द हुने अवस्थासम्म पुगेको यो विद्यालय अहिले भने क्रमशः सुधारतर्फ अघि बढिरहेको छ। हाल विद्यार्थी संख्या बढेर ९३ पुगेको र नगरपालिकाले शिक्षालाई विशेष प्राथमिकतामा राख्दै गुणस्तर सुधारमा निरन्तर लगानी गरिरहेको उहाँले बताउनुभयो।
विद्यालयका सहायक प्रधानाध्यापक कृष्ण ओलीले सहयोग गर्ने सम्पूर्ण दाताहरू, सामाजिक व्यक्तित्व र सहयोगी हातप्रति हार्दिक धन्यवाद व्यक्त गर्दै यस्ता सहयोगले बालबालिकाको मनोबल बढ्नुका साथै शिक्षाप्रति थप आशा जागेको बताउनुभयो।
प्रकाशित मिति: आइतबार, मंसिर १४, २०८२
