सर्लाही । सर्लाहीको लालबन्दी नगरपालिका ७ डुमडुमे मन्दिर नजिक एक पुरुषले आफ्नै शरीरमा पेट्रोल छर्की आगो लगाएको घटनामा गम्भीर घाइते भएका व्यक्तिको उपचारका क्रममा मृत्यु भएको छ।
इ.प्र.का. लालबन्दीका अनुसार हिजो गते साँझ अन्दाजी ४०–४५ बर्ष उमेरका पुरुषले शरीरमा पेट्रोल छर्की आगो लगाएको अवस्थामा स्थानीयले देखेपछि करिब प्रहरीलाई जानकारी दिएका थिए। सूचना पाएपछि प्रहरि निरिक्षक बीरेन्द्र सिंह जोहारीको कमाण्डमा आएको प्रहरी टोली ती पुरुष आगोले गम्भीर रूपमा जलेका अवस्थामा फेला परेका थिए।
तत्कालै घाइतेलाई लालबन्दीमा रहेको एक अस्पताल पुर्याइएको थियो। शरीरको ९० प्रतिशत भाग जलेको र अवस्था अत्यन्तै गम्भीर भएपछि उनलाई राति एम्बुलेन्समार्फत प्रादेशिक अस्पताल जनकपुरतर्फ पठाइएको थियो।
प्रादेशिक अस्पताल जनकपुरमा उपचारका क्रममा मंसिर १० गते राति ०२:१० बजे घाइते व्यक्तिको मृत्यु भएको प्रहरीले जनाएको छ। मृतकको पहिचान सुरुवातमा खुल्न नसके पनि पछि उनका नातेदारसँग सम्पर्क हुँदा मृतक झापा, गौरादह नगरपालिका–२ निवासी धनपती पोख्रेलका छोरा ५५ वर्षीय सूर्य प्रसाद पोख्रेल भएको खुलेको प्रहरी स्रोतले जानकारी दिएको छ।
घटनाको विस्तृत कारणबारे थप अनुसन्धान भइरहेको इलाका प्रहरी कार्यालय लालबन्दीले जनाएको छ।
प्रकाशित मिति: बुधबार, मंसिर १०, २०८२
