देशकै सबैभन्दा धेरै सर्लाही जिल्लामा २० वटा स्थानीय तह रहे पनि दमकल भने एउटा नगरपालिकासँग मात्रै रहेको छ । जेन–जी आन्दोलनभन्दा अघि सदरमुकामसमेत रहेको मलङ्गवा नगरपालिका र हरिवन नगरपालिकासँग मात्रै दमकल थियो ।
तर जेन–जी आन्दोलनका क्रममा हरिवन नगरपालिकासँग भएको दमकलमा आन्दोलनकारीले आगो लगाइदिएपछि जलेर पूर्ण रुपमा नष्ट भएको छ । आगो निभाउने दमकलमै प्रदर्शनकारीले आगो लगाइदिएपछि जिल्लामा आगलागी भइहाले तत्काल निभाउन समस्या हुने भएको छ ।
आन्दोलनका नाममा नगर प्रमुुख, उपप्रमुुख तथा कर्मचारी चढ्ने सवारीसाधन मात्र नभएर आगो निभाउने दमकलमा समेत प्रदर्शनकारीले आगो लगाएका थिए ।
दमकलमासमेत आगलागी गरि नष्ट गरेपछि जिल्लामा दमकलको अभाव भएको छ । दमकल अभावमा आगलागी भएमा निभाउन समस्या हुने देखिएको हो ।
सर्लाहीका जुनसुकै स्थानमा आगलागी हुँदा मलङ्गवा र हरिवन नगरपालिकाकै दमकल पुग्ने गरेको थियो । हरिवन नगरपालिकाको दमकल प्रदर्शनकारीले जलाएसँगै अब मलङ्गवा नगरपालिकाको मात्रै दमकलले जिल्लाभर काम गर्नुपर्ने अवस्था छ ।
यस अघि ग्रामिण भेगका पालिकाहरूमा आगलागीका घटना हुँदा समयमै दमकल पुग्न नसक्दा जनधनको धेरै क्षति हुँदै आएको थियो ।
आगलागीका समयमा दमकल खरिद गर्नेबारे अरु स्थानीय तहले चासो देखाउने गरे पनि अन्य समयमा भने बिर्सने यहाँको चलन जस्तै बनेको छ ।
दुईभन्दा बढी स्थानीय तहले संयुक्त रुपमा दमकल खरिद गर्ने निर्णय भए पनि त्यसतर्फ अहिले कुनै पनि पालिकाले चासो देखाएका छैनन् । २० पालिका भए पनि दमकल खरिदमा चासो नदिनु दुःखद रहेको नगारिक समाज सर्लाहीका अगुुवा रजनी कान्त झाले बताउनुभयो ।
जेन–जी आन्दोलनका क्रममा सर्लाहीको मलङ्गवा नगरपालिकासहित ईश्वरपुुर, लालबन्दी, हरिवन, बागमती, बरहथवा, हरिपुुर र हरिपूर्वा नगरपालिका र चन्द्रनगर गाँउपालिकाको कार्यालयमा आगजनी गरिएको छ । जिल्लाको लालबन्दी र हरिवन तथा बरहथवा नगरपालिकाको भवन पूर्ण रुपमा जलेका छन् भने अरु पालिका आंशिक जलेका छन् ।
प्रकाशित मिति: मंगलबार, भदौ ३१, २०८२
