सर्लाही । सर्लाहीसहित तराई मधेसका किसानलाई पानी परेपछि राहत मिलेको छ।
लामो समयदेखि परेको खडेरीपछि हिजो शनिबार दिउँसोदेखि परेको पानीले खेतीपातीमा आशा जगाएको हो।
आकासे पानीको भरमा खेती गर्ने किसान पानी नपरेपछि चिन्तित थिए। पानी नहुँदा रोपेको धान पहेँलिँदै जान थालेको र नयाँ रोपाइँ रोकिएको थियो। अब भने पानी परेपछि किसानले फेरि रोपाइँ सुरु गर्न पाउने भएका छन्।
सर्लाहीमा असार १५ पछि यसअघि पर्याप्त वर्षा भएको थिएन। यसले गर्दा धान रोप्ने समय वित्ने डरसँगै विउ सुक्ला भन्ने चिन्ता किसानमा थियो। अब पानी केही दिन निरन्तर परेमा धेरै किसानले रोपाइँ सक्ने अपेक्षा गरेका छन्।
पहिले बिजुलीको मोटर, पम्पसेट, नहर वा कुलोको भरमा रोपेका धान समेत अब हरियाली फर्कने देखिएको छ। ईश्वरपुरका किसान गोमा गर्तौलाले आज आइतबार बिहान परेको पानीले पहिले रोपिएको धानलाई अमृत जस्तै भएको बताउनुभयो ।
वर्षाले चर्को घाम र गर्मीबाट पनि राहत दिएको छ। यससँगै खेतबारीमा सुकेको घाँस पलाउने भएकाले पशुपालक किसान पनि खुसी भएका छन्।
पानी निरन्तर प¥यो भने तराई मधेसका सुख्खा इनार, कुवा, खोलामा पनि पानी फर्कने र खानेपानीको समस्या केही हदसम्म कम हुने सम्भावना छ।
कृषि विकास निर्देशनालय जनकपुरका अनुसार मधेसमा अहिले मात्र ५७ प्रतिशत क्षेत्रमा धान रोपाइँ सम्पन्न भएको छ। प्रमुख जितेन्द्र यादवका अनुसार किसानले बीउ जोगाउन सकेमा एक हप्ताभित्र सबै रोपाइँ सक्ने स्थिति बन्न सक्छ।
प्रकाशित मिति: आइतबार, साउन १८, २०८२
