काठमाडौँ । विश्व स्वास्थ्य सङ्गठनका अनुसार हरेक वर्ष ११ लाख मानिसको हेपाटाइटिस बी र सी का कारण मृत्यु हुने गर्छ ।
यसैगरी १४ लाख मानिस क्रोनिक हेपाटाइटिस सी भाइरसबाट सङ्क्रमित हुने गरेका छन् । नेपालमा हेपाटाइटिसका विरामी कति छन् भन्ने बारेमा यकीन तथ्याङ्क नभएपनि कुल जनसङ्ख्याको एक प्रतिशत मानिसमा हेपाटाइटिस बी भएको डाक्टरहरू बताउँछन् ।
विश्व स्वास्थ्य सङ्गठनको विश्वव्यापी हेपाटाइटिस रणनीतिअनुसार नेपालले पनि सन् २०३० सम्म नयाँ हेपाटाइटिस सङ्क्रमण ९० प्रतिशत र मृत्युलाई ६५ प्रतिशतले घटाउने लक्ष्य राखेको छ । सीआईएनसँग कुरा गर्दै वरिष्ठ कलेजो रोग विशेषज्ञ डा. दिलिप शर्माले लक्ष्य पूरा हुन चुनौती रहेको बताउनुभयो ।
उहाँका अनुसार हेपाटाइटिस नभएका व्यक्तिले यसविरुद्धको खोप लगाउने, उमालेको पानी पिउने र सफा स्वच्छ आहार खाने, रातो मासु, रक्सी नखाने र जन्डिस तथा खाना अरुचिको लक्षण देखिएमा चिकित्सकको परामर्श लिनुपर्छ।
प्रकाशित मिति: सोमबार, साउन १२, २०८२
