काठमाडौँ । सेभ द चिल्ड्रेनले बालअधिकार प्रवर्धनसम्बन्धी पहिलो अन्तर्राष्ट्रिय दस्तावेज जेनेभा घोषणापत्र जारी भएको १ सय वर्ष पुगेको अवसरमा बालअधिकारको शताब्दी महोत्सव मनाएको छ ।
सेभ द चिल्ड्रेनका संस्थापक एग्लेन्टाइन जेबको नेतृत्वमा जारी भएको यो घोषणापत्रले विश्वभर नै बालअधिकार पैरवीका लागि ऐतिहासिक आधारशीला निर्माण गरेको थियो ।
नेपालमा सेभ द चिल्ड्रेनले बालअधिकार प्रवर्धनका लागि बालबालिकासँग ४० वर्ष लामो यात्रा पूरा गरेको उपलक्ष्यमा एक कार्यक्रमको आयोजना गरेको छ ।
कार्यक्रममा सेभ द चिल्ड्रेन नेपाल र भुटानका राष्ट्रिय निर्देशक तारा क्षेत्रीले भन्नुभयो,“ हामीले बालअधिकार सुनिश्चितताका लागि बालबालिका, समुदाय र नागरिक समाज सङ्गठनहरूसँगको सहकार्य गर्दैआएका छौँ। बालबालिकाहरूले जलवायु परिवर्तनका कारण सिर्जना भएका विपद्हरूदेखि अनलाइन तथा अफलाइन जोखिमसम्मका चुनौतीहरूको सामना गरिरहेको अहिलेको समयमा बालबालिकाका अधिकार र समाजमा उनीहरूको अर्थपूर्ण सहभागिताका लागि हामी एकजुट छौँ । अबको समयमा हामीले बालबालिकासँग अझ बढी सहकार्य गर्न आवश्यक छ।”
उहाँले नेपालमा बालअधिकारलाई राष्ट्रको विकास र समृद्धिको आधार बनाउन सङ्घीय, प्रदेश र स्थानीय तीनै तहका सरकारहरुसँग थप समन्वय र पहलहरुको लागि आह्वान गर्नुभयो ।
कार्यक्रममा “नेपालमा बालअधिकार अभियानः अवसर र भावी मार्गचित्र” शीर्षकको अध्ययन प्रतिवेदन पनि सार्वजनिक गरिएको थियो ।
प्रतिवेदनले देशमा बालअधिकारको विकासक्रमलाई समीक्षा गर्दै आगामी प्राथमिकताहरू प्रस्तुत गरेको छ । उक्त दस्तावेजले बालबालिकामा रणनीतिक लगानी बढाउनुपर्ने र नेपालको बालअधिकार अभियानले हासिल गरेका उपलब्धिहरुलाई दिगो रुपमा कायम राख्न भावी पुस्ताका बाल अभियन्ताहरु तयार गर्नुपर्नेमा जोड दिएको छ ।
उक्त अवसरमा नेपाल सरकारका महिला, बालबालिका तथा ज्येष्ठ नागरिक मन्त्री माननीय नवल किशोर साह सुडीले आफ्नो धारणा व्यक्त गर्दै भन्नुभयोः “बालबालिकालाई राष्ट्र निर्माणको प्रभावशाली साझेदारको रूपमा लिइनुपर्छ । विशेषगरी विशेष संरक्षण आवश्यकता भएका बालबालिकालाई प्राथमिकता दिँदै बालअधिकार प्रवर्धन गर्न र बालबालिकाको आवाजलाई नीति निर्माणको हरेक तहमा समेट्न सरकार प्रतिबद्ध छ ।”
युरोपेली संघका नेपालका लागि राजदूत भेरोनिक लोरेन्जोले बालअधिकार प्रवर्धनमा नागरिक समाजको महत्वपूर्ण भूमिका रहने बताउँदै भन्नुभयोः “बालबालिका परिवर्तनको प्रकृयाका महत्वपूर्ण र अभिन्न अङ्ग हुन् । सशक्त नागरिक समाज बालबालिकाको हकहितको लागि अत्यन्त आवश्यक छ । सेभ द चिल्ड्रेन, सरकार र अन्य साझेदारहरुसँग सहकार्य गर्दै बालबालिकाको अवस्थामा सुधार ल्याउँन यूरोपियन यूनियन प्रतिबद्ध छ ।” उहाँले बालअधिकारका लागि वृहत् साझेदारीको आवश्यकता औँल्याउँदैे सबै क्षेत्रले बालअधिकारको विषयप्रति अपनत्व कायम गर्नुपर्ने धारणा राख्नुभयो ।
कार्यक्रममा नेपालभरका बालबालिका र युवाको नेतृत्वमा सञ्चालन भएका जलवायु र लैङ्गिक न्याय जस्ता महत्वपूर्ण विषय केन्द्रित अभियानसम्बन्धी प्रस्तुतिहरू गरिएको थियो ।
विभिन्न नागरिक समाज सङ्गठनहरुद्वारा बालअधिकार प्रवर्धनका लागि सञ्चालित आफ्ना कार्य झल्काउने स्टल राखिएका थिए ।
प्रकाशित मिति: आइतबार, मंसिर १६, २०८१, ०८:०६
