काठमाडौँ । काभा नेसन्स लिग महिला भलिवलमा नेपालले आज भारतसँग खेल्दैछ । खेल साँझ ५ बजेपछि त्रिपुरेश्वरमा रहेको राखेपको कभर्डहलमा सुरु हुनेछ । मंगलबार भएको सेमिफाइनलमा नेपालले इरानलाई र भारतले श्रीलंकालाई हराउँदै फाइनल भेट पक्का गरेका हुन् ।
प्रतियोगिताको लिग चरण अन्तर्गत शनिबार भएको खेलमा नेपालले भारतलाई हराएको थियो । भारतलाई पहिलोपटक हराएर उत्साही नेपाली टोलीसामू फेरि भारतलाई नै हराउने अवसर आएको हो । यसपटक भारतलाई हराउन सके नेपालले उपाधि जित्नेछ ।
सन् २०१९ मा दक्षिण एसियाली खेलकुद सागको महिला भलिवलको फाइनलमा नेपाल भारतसँग बेष्ट अफ फाइभको अन्तिम सेटमा पराजित हुँदै उपाधि गुमाएको थियो ।
प्रतियोगितामा सहभागी सबै टिमलाई हराएको हुनाले नेपाल उच्च मनोबलमा रहेको प्रशिक्षक जगदिश भट्टको भनाइ छ । विपक्षी टोली अनुसारको रणनीति बनाएर खेल्ने उहाँले बताउनुभयो ।
नेपालले लिग चरणमा भारत, माल्दिभ्स र श्रीलंकालाई पराजित गरेको थियो भने इरानसँग हारको थियो तर इरानसँग लिग चरणमा भोगेको हारको बदला लिएको थियो ।
प्रकाशित मिति: बुधबार, साउन २३, २०८१, ०७:००
