हुम्ला । काठमाडौँ–केरुङ–हिल्सा हुँदै हुम्लाको सल्ली खोलासम्म आइपुगेको ४ हजार क्विन्टल मध्ये ३ सय क्विन्टल चामल अलपत्र परेको छ ।
नेपाल खाद्य संस्थान सिमकोटमा आर्थिक वर्ष २०७५/०७६ मा आइपुग्नुपर्ने ४ हजार क्विन्टल मध्ये तीन हजार ७ सय क्विन्टल पुगेको र बाँकी चामल सल्ली खोलामा नै रोकिएको हो । भदौ महिनाबाट केरुङ हुँदै हिल्सा पुगेको चामल भदौ महिनाबाट टिपरबाट सिमकोट ओसार्न थालिएको थियो ।
सल्लीसम्म पुगेको चामल भदौदेखि मङ्सिर महिनासम्म सरदमुकाम सिमकोट ओसारिए पनि ३ हजार ७ सय क्विन्टल चामल मात्रै पुगेको सिमकोट खाद्य संस्थान शाखा हुम्लाका प्रमुख रामबहादुर विष्टले बताउनुभयो । प्रमुख विष्टले भन्नुभयो, ‘मङ्सिर महिनाको अन्तिम सातादेखि जिल्लामा निरन्तर हिमपात भएको छ । सिमकोट पुग्नुपर्ने बाँकी चामल हिमपातले कुहियो होला ।’
हुम्लामा पुस र माघमा हिमपात भएको छ । सल्ली खोला उच्च हिमाली गाउँमा पर्छ । ‘सरदमुकाम सिमकोटभन्दा बढी हिमपात भएकोे त्यस क्षेत्रमा प्लाष्टिकको भरमा छोपेर राखिएको चामल राम्रो त के बस्यो होला र ?’ उहाँले भन्नुभयो ।
हवाई मार्गबाट ४५ मिनेटमा सिमकोट पुग्ने चामल काठमाडौँ केरुङबाट स्थलमार्गबाट आउन ६ दिन लाग्छ ।
हवाई मार्ग भन्दा स्थलमार्गबाट भाडादर कम पर्ने भएता पनि समयमा आउनुपर्ने चामल एक वर्षसम्म नपुग्दा सिमकोट गाउँपालिका र खार्पुनाथा गाउँपालिकाका स्थानीयबासीलाई समस्या परेको छ ।
ठेकेदारको लापारवाही र ढिलासुस्तीले स्थलमार्गबाट सल्लीमा पुगेको चामल सिमकोट नपुगेर बिचबाटोमै अलपत्र परेको हो । हवाईमार्ग र स्थलमार्गबाट हुम्लामा चामल पु¥याउने जिम्मा लिएका चङ्खेली देउतीबजै जेभिका ठेकेदार धु्रव शाहीले भने त्यो विषयमा आफूलाई कुनै जानकारी नभएको बताउनुभयो ।
उहाँले कामदारलाई सोधेर यसबारेमा जानकारी दिने बताउनुभयो ।
प्रकाशित मिति: सोमबार, माघ २७, २०७६, १२:१५
