काठमाडौँ । सामुदायिक रेडियो प्रसारक संघ (अकोराब) नेपाल विश्वव्यापी सार्वजनिक सेवा तथा जनहितकारी सञ्चारमाध्यमको संस्था, पब्लिक मिडिया एलायन्स (पीएमए) को सदस्यमा आबद्ध भएको छ ।
पीएमएले अकोराबलाई आफ्नो विश्वव्यापी संस्थाको एफिलिएट सदस्यका रूपमा स्वागत गरेको अकोराबका अध्यक्ष अर्जुन गिरीले जानकारी दिनुभयो ।
पीएमएले सार्वजनिक हितका सञ्चारमाध्यमको वातावरण निर्माण, गुणस्तरीय पत्रकारिता प्रवर्द्धन तथा सदस्य संस्थाबीच ज्ञान, नीति, अभ्यास र अनुभव आदानप्रदानका कार्यक्रम गर्दै आएको छ ।
अकोराबले नेपालका सामुदायिक रेडियोहरूलाई सुशासन, विकास सञ्चार, मानव अधिकार तथा सामाजिक, सांस्कृतिक र आर्थिक विकासलगायतका विषयमा रेडियो कार्यक्रम उत्पादन तथा प्रसारण गर्न सहजीकरण गर्दै आएको छ ।
एफिलियट सदस्यताले नेपालमा सार्वजनिक हितका सञ्चारमाध्यमको विकासका लागि पीएमए र अकोराबबीच सहकार्य तथा अनुभव आदानप्रदानको अवसर विस्तार हुने अपेक्षा गरिएको अध्यक्ष गिरीले बताउनुभयो ।
पीएमएका अनुसार एफिलिएट सदस्यता सार्वजनिक सेवा तथा जनहितकारी सञ्चारको क्षेत्रमा महत्वपूर्ण भूमिका निर्वाह गर्ने संस्थाहरूका लागि प्रदान गरिन्छ । यस्तो सदस्यताबाट तालिम, अनुभव आदानप्रदान र सञ्जाल निर्माणलगायतका अवसर प्राप्त हुन्छन् ।
अध्यक्ष गिरीले पीएमएसँग आबद्ध हुन पाउँदा खुसी व्यक्त गर्दै यसबाट नयाँ सञ्चार नीति, अभ्यास र सार्वजनिक प्रसारण क्षेत्रसम्बन्धी पारस्परिक अनुभव आदानप्रदानमा सहयोग पुग्ने विश्वास व्यक्त गर्नुभएको छ ।
सञ्चार प्रणालीको तीव्र विकास र विस्तारसँगै समुदायस्तरका सञ्चारमाध्यमको भूमिकालाई बुझेर नयाँ नीति निर्माण गर्न सहकार्य उपयोगी हुने उहाँको भनाइ छ ।
गलत सूचना र दुष्प्रचारको प्रभाव बढिरहेको अवस्थामा सार्वजनिक सञ्चारमाध्यमको भूमिका अझ महत्वपूर्ण बन्दै गएको उल्लेख गर्दै गिरीले पीएमएसँगको सहकार्यले सामुदायिक सञ्चार क्षेत्रमा नयाँ आयाम थप्ने विश्वास व्यक्त गर्नुभएको छ ।
पीएमएका प्रमुख कार्यकारी अधिकृत क्रिस्टियन पोर्टरले अकोराबलाई सदस्यका रूपमा स्वागत गर्न पाउँदा खुसी लागेको बताउँदै प्रविधिमा भइरहेको तीव्र परिवर्तनका बीच सार्वजनिक हितका सञ्चारमाध्यमबीच सहकार्य र अनुभव आदानप्रदान आवश्यक रहेकोमा जोड दिनुभएको छ ।
स्थानीय तहसम्म विश्वसनीय, सान्दर्भिक र तथ्यपरक सूचनामा समुदायको पहुँच सुनिश्चित गर्न सहकार्य महत्वपूर्ण हुने पोर्टरको भनाइ छ ।
अकोराबको सदस्यताले पीएमएका सदस्यहरूलाई समुदायस्तरमा यस्तो सञ्चार कसरी प्रभावकारी बनाउन सकिन्छ भन्ने विषयमा थप बुझ्ने अवसर प्रदान गर्ने पोर्टरले उल्लेख गरेका छन् । पब्लिक मिडिया एलायन्स सार्वजनिक सेवा प्रसारकहरूको विश्वव्यापी संस्था हो ।
सन् १९४५ मा स्थापना भएको पीएमएले सार्वजनिक सेवा सञ्चारमाध्यमको प्रवर्द्धन, सहकार्य र पैरवी गर्दै आएको छ ।
छवटा महादेशमा सदस्यता रहेको संस्थाले सार्वजनिक सञ्चारमाध्यमबीच विचार, दृष्टिकोण र उत्कृष्ट अभ्यास आदानप्रदानका लागि अवसर प्रदान गर्दै आएको छ ।
प्रकाशित मिति: शनिबार, असोज १०, २०८३
